歷代志下卷 15 - 現代台語譯本漢字版

亞撒的改革

¹ 上帝的神臨到俄德的子亞撒利雅。

² 伊就去見亞撒，對伊講：「亞撒及猶大、便雅憫的人民，請聽我講。恁若順趁上主，伊就及恁同在；恁若尋求伊，伊會互恁尋著；毋拘恁若棄拺伊，伊嘛會棄拺恁。

³ 以色列人已經真久無信真神，無教導的祭司，無律法，

⁴ 毋拘𪜶佇患難的時歸向尋求上主 — 以色列的上帝，伊就互𪜶尋著。

⁵ 彼時，列國的住民抵著大擾亂，人出入無平安。

⁶ 國攻擊國，城攻擊城，上帝用逐款災難擾亂𪜶。

⁷ 今恁著堅強，毋通失膽，因為恁的所做會得著報賞。」

⁸ 亞撒聽著諸個話，及俄德的子亞撒利雅的預言，就堅強起來，佇猶大及便雅憫全地，以及伊所攻取以法蓮山區許個城，廢除所有可惡的偶像，閣修建聖殿走廊頭前上主的祭壇。

⁹ 伊閣聚集猶大人、便雅憫人，以及寄居佇𪜶中間的以法蓮人、瑪拿西人，及西緬人；有真多以色列人出來歸順亞撒，因為𪜶看見上主 — 伊的上帝及伊同在。

¹⁰ 亞撒王第十五年三月，𪜶攏聚集佇耶路撒冷。

¹¹ 彼日，𪜶對帶來的戰利品中間，奉獻七百隻牛及七千隻羊做祭互上主。

¹² 𪜶立約，欲全心全意尋求上主 — 𪜶列祖的上帝；

¹³ 所有無尋求上主 — 以色列的上帝的人，無論男女大細，攏著處死。

¹⁴ 𪜶就大聲歡呼，歕哨角及喇叭，對上主咒誓。

¹⁵ 猶大人民攏真歡喜，因為𪜶全心對上主咒誓，閣全意尋求上主，上主就互𪜶尋著，賞賜𪜶四境平安。

¹⁶ 亞撒王廢除伊的阿嬤瑪迦太后的位，因為瑪迦有造亞舍拉可惡的神像。亞撒將神像剉掉，破互碎碎，佇汲淪溪谷放火燒。

¹⁷ 雖然許個山頭壇猶未對以色列中除去，毋拘亞撒一生完全順服上主。

¹⁸ 伊將伊的老父及伊本身分別作聖的金、銀，及器具，攏帶入上帝的聖殿。

¹⁹ 對彼時到亞撒作王第三十五年，攏無閣有戰爭。