歷代志下卷 12 - 現代台語譯本漢字版

埃及侵犯猶大

¹ 羅波安的王國一下穩固強盛，伊就棄拺上主的律法，所有的以色列人嘛攏隨伊。

² 羅波安王第五年，埃及王示撒上來攻擊耶路撒冷，因為以色列人得罪上主。

³ 示撒有戰車一千兩百台，馬兵六萬；閣導利比亞人、蘇基人、古實人，對埃及上來，人多甲算𣍐了。

⁴ 伊攻取猶大堅固的城，來到耶路撒冷。

⁵ 彼時，猶大的領袖因為示撒的緣故，佇耶路撒冷聚集；先知示瑪雅來見羅波安及許個領袖，對𪜶講：「上主按呢講：『恁棄拺我，所以我棄拺恁，將恁交佇示撒的手。』」

⁶ 以色列許個領袖及王就謙卑認罪，講：「上主是公義。」

⁷ 上主看見𪜶家己謙卑，上主的話臨到示瑪雅講：「𪜶既然謙卑認罪，我無欲剿滅𪜶，欲互𪜶暫時得著解救；我無欲通過示撒的手將我的受氣摒落佇耶路撒冷。

⁸ 毋拘𪜶會做示撒的奴僕，互𪜶知，服事我及服事地上列國有什麼無相像。」

⁹ 對按呢，埃及王示撒上來攻擊耶路撒冷，將上主聖殿及王宮的寶物攏搶去，閣搶所羅門所做許個金的盾牌。

¹⁰ 羅波安王做銅的盾牌代替許個金的盾牌，交互顧王宮大門的侍衛長顧守。

¹¹ 王逐遍入上主的殿，侍衛就夯諸個盾牌，後來閣帶倒轉下佇侍衛室。

¹² 王家己謙卑的時，上主就無閣受氣，無完全給伊剿滅；猶大的情形嘛有改善。

羅波安死

¹³ 羅波安佇耶路撒冷作王，加強伊的統治。羅波安坐位的時四十一歲。伊佇耶路撒冷作王十七年；耶路撒冷是上主對以色列眾支族中揀選互人來敬拜伊的城。羅波安的老母叫做拿瑪，是亞捫人。

¹⁴ 羅波安做邪惡的事；伊無堅決尋求上主。

¹⁵ 羅波安的事蹟，對頭到尾攏記載佇先知示瑪雅及先見易多的言行錄。羅波安及耶羅波安常常交戰。

¹⁶ 羅波安轉去伊的列祖遐，人給伊安葬佇大闢城；伊的子亞比雅續接伊作王。