歷代志下卷 11 - 現代台語譯本漢字版

示瑪雅的預言

¹ 羅波安到耶路撒冷，就聚集猶大家及便雅憫支族特選的戰士，共十八萬人，欲及以色列家交戰，互歸個王國閣歸屬伊家己。

² 毋拘上主的話臨到上帝重用的人示瑪雅，講：

³ 「你去給所羅門的子猶大王羅波安，猶大及便雅憫的人民，講：

⁴ 『上主按呢講：恁毋通去及恁的兄弟交戰；逐個人倒去家己的厝，因為此個代誌出佇我。』」𪜶就聽趁上主的話倒去，無去攻擊耶羅波安。

羅波安起堅固的城

⁵ 羅波安住佇耶路撒冷。伊佇猶大地起幾若個堅固的城，

⁶ 就是伯利恆、以坦、提哥亞、

⁷ 伯‧夙、梭哥、亞杜蘭、

⁸ 迦特、瑪利沙、西弗、

⁹ 亞多萊音、拉吉、亞西加、

¹⁰ 瑣拉、亞雅崙，及希伯崙；諸個攏是猶大及便雅憫堅固的城。

¹¹ 羅波安閣強化許個堅固的城，設指揮官，囤積糧食、橄欖油，及酒；

¹² 閣準備盾牌及槍，互諸個城閣較堅固。猶大及便雅憫攏受伊統治。

祭司及利未人歸猶大

¹³ 以色列全地的祭司及利未人攏對逐所在來歸順羅波安。

¹⁴ 利未人放棄𪜶的草埔及產業，來到猶大及耶路撒冷，因為耶羅波安及伊許個子毋准𪜶執行祭司的職務，服事上主。

¹⁵ 耶羅波安為山頭壇、山羊鬼，及伊所造的牛仔像，家己設立祭司。

¹⁶ 以色列各支族，所有決心欲尋求上主 — 以色列的上帝的人，攏隨利未人去耶路撒冷，欲獻祭互上主 — 𪜶列祖的上帝。

¹⁷ 按呢，𪜶互猶大國穩固；三年久擁護所羅門的子羅波安，因為𪜶遵行大闢及所羅門的路三年久。

羅波安的家庭

¹⁸ 羅波安娶瑪哈拉做某；瑪哈拉的老父是大闢的子耶利摩，老母是耶西的查某孫，以利押的查某子亞比孩。

¹⁹ 瑪哈拉生三個子，耶烏施、示瑪利雅，及撒罕。

²⁰ 後來羅波安閣娶押沙龍的查某子瑪迦做某；伊生四個子，亞比雅、亞太、細撒，及示羅密。

²¹ 羅波安有十八個某，六十個妃，生二十八個子，六十個查某子；佇諸個某及妃的中間，伊上疼押沙龍的查某子瑪迦。

²² 羅波安設立瑪迦的子亞比雅做太子，佇伊的兄弟中做頭，欲設立伊續接作王。

²³ 羅波安做事精明，分派伊所有的子去猶大及便雅憫全地逐個堅固的城；閣互𪜶充足的糧食，給𪜶娶真多某。