歷代志下卷 1 - 現代台語譯本漢字版

所羅門求智慧

¹ 大闢的子所羅門堅固伊對以色列的統治，上主 — 伊的上帝及伊同在，互伊受尊做大。

² 所羅門召集以色列眾人，就是管一千人及管一百人的軍官、審判官，以及全以色列的領袖及族長，

³ 導𪜶去基遍的山頭壇；佇遐有上帝的會幕，是上主的僕人摩西佇曠野所造的。

⁴ 彼時大闢已經將上帝的約櫃對基列‧耶琳徙來耶路撒冷，囥佇伊為著約櫃搭的布棚。

⁵ 毋拘戶珥的孫，烏利的子比撒列所造的銅壇猶佇基遍上主的會幕前；所羅門及會眾佇遐求問上主。

⁶ 所羅門佇會幕前敬拜上主，佇銅壇獻一千隻牲生做燒化祭。

⁷ 彼暝，上帝對所羅門顯現，給伊講：「你愛我賜你什麼，通對我求。」

⁸ 所羅門對上帝講：「你曾施大恩互我的老父大闢，閣互我續接伊作王。

⁹ 主上帝，今求你實現你對我的老父大闢的應允，因為你設立我做此個人民的王，𪜶親像地上的土沙赫多。

¹⁰ 今求你賜我智慧聰明，互我通領導此個國家，治理諸個人民；若毋是按呢，啥人會當治理你即多的人民？」

¹¹ 上帝對所羅門講：「既然你的心意是按呢，無求錢財、富足、尊榮，及消滅對敵的性命，嘛無求長歲壽，只有求智慧聰明，通治理我的子民，就是你受設立作王治理的人民。

¹² 所以我欲賜你智慧聰明，嘛欲賜你錢財、富足、尊榮；超過你以前的列王，佇你以後嘛𣍐有人親像你按呢。」

所羅門的兵力及財力

¹³ 所羅門對基遍山頭壇的會幕倒來耶路撒冷，作王治理以色列。

¹⁴ 所羅門王有建立軍隊，戰車一千四百台，馬兵一萬兩千名；給𪜶安置佇許個囤戰車的城，及耶路撒冷王遐。

¹⁵ 王統治期間，耶路撒冷的金銀親像石頭赫多，柏香柴親像山埔的桑材樹赫多。

¹⁶ 所羅門的馬攏對埃及及科威進口，是王的生理人對科威照市價買來的。

¹⁷ 對埃及進口的戰車，逐台大約七公斤的銀；戰馬逐隻大約兩公斤的銀。所羅門的生理人嘛經手，將諸個出口賣互赫人及敘利亞人許個王。