歷代志上卷 16 - 現代台語譯本漢字版

¹ 諸個利未人扛上帝的約櫃入去，下佇大闢為著約櫃搭的布棚內面，閣佇上帝的面前獻燒化祭及平安祭。

² 大闢獻燒化祭及平安祭了後，就奉上主的名給人民祝福。

³ 伊閣分物件互以色列眾人，無論男女，逐個人一塊餅，一塊肉，一粒葡萄乾丸。

⁴ 大闢派幾若個利未人佇上主的約櫃前服事，來懇求，感謝，稱讚上主 — 以色列的上帝。

⁵ 隊長是亞薩，副隊長是撒迦利亞，閣有雅薛、示米拉末、耶歇、瑪他提雅、以利押、比拿雅、俄別‧以東、耶利，彈琴彈瑟；亞薩拍鈸伴奏。

⁶ 祭司比拿雅及雅哈悉佇上帝的約櫃前照時歕喇叭。

⁷ 彼日，大闢第一遍指派亞薩及伊的親族感謝上主。

頌讚的歌

⁸ 恁著感謝上主，求叫伊的名， 佇萬民中報揚伊的作為。

⁹ 著對伊吟詩，向伊唱歌謳咾， 談論伊一切奇妙的所做。

¹⁰ 著誇耀伊的聖名。 願尋求上主的人心內歡喜。

¹¹ 著倚靠上主及伊的權能， 不時尋求見伊的面。

^12-13 伊的僕人以色列的後代， 伊所揀雅各的子孫啊， 恁著數念伊奇妙的作為， 數念伊的神跡及伊所講判斷的話。

¹⁴ 伊是上主 — 咱的上帝； 伊的審判普及全地。

¹⁵ 著會記得伊的約直到永遠， 伊的應允直到萬代。

¹⁶ 著會記得伊及亞伯拉罕立的約， 對以撒所立的誓。

¹⁷ 伊將此個約互雅各做規例， 互以色列做永遠的約。

¹⁸ 伊講：「我欲將迦南地賜互你， 做你應得的產業。」

¹⁹ 當時𪜶的人口有限，人數真少； 𪜶佇遐做出外人。

²⁰ 𪜶對此族行到彼族， 對此國到彼國。

²¹ 伊無容允人壓迫𪜶； 為著𪜶的緣故，伊譴責許個君王。

²² 伊講：「毋通磕著我揀選的僕人， 嘛毋通欺負我的先知。」

²³ 全地攏著對上主唱歌！ 著日日宣布伊拯救的好消息！

²⁴ 著對萬國宣揚伊的榮耀！ 著對萬民講起伊偉大的作為！

²⁵ 因為上主至大，應該受極大的稱讚； 伊比所有的神明應該閣較受敬畏。

²⁶ 因為外邦的神明不過是偶像； 毋拘上主創造諸個天。

²⁷ 尊貴及威嚴包圍伊； 權能及喜樂充滿伊的所在。

²⁸ 地上萬民攏著稱讚上主！ 著將榮耀及權能歸互伊！

²⁹ 著將上主應得的榮耀歸互伊！ 著帶祭物來到伊的面前！ 著穿聖潔做禮服敬拜上主！

³⁰ 全地著佇伊面前驚惶皮皮惙！ 世界堅固𣍐動搖；

³¹ 天著歡喜，地著快樂！ 著對萬國宣布：「上主作王！」

³² 海及彼內面的活物攏著出大聲！ 田園及其中所有的攏著快樂！

³³ 彼時，樹林內的樹木攏欲佇上主面前歡喜唱歌， 因為伊欲來審判普天下。

³⁴ 著感謝上主，因為伊至善； 伊的慈愛續到永遠！

³⁵ 著講：「拯救阮的上帝啊，求你拯救阮， 聚集阮，救阮脫離列國， 互阮通感謝你的聖名， 用稱讚你做阮上大的歡喜。

³⁶ 願稱讚歸互上主 — 以色列的上帝， 對永遠到永遠。」 全體人民攏講「阿們！」閣稱讚上主。

佇耶路撒冷及基遍的敬拜

³⁷ 大闢留亞薩及伊的親族佇上主的約櫃前，照逐日應該做的工作，繼續佇約櫃前服事。

³⁸ 閣留俄別‧以東及伊的親族六十八人，以及耶杜頓的子俄別‧以東及何薩做約櫃的守衛。

³⁹ 閣留祭司撒督及伊的親族眾祭司，佇基遍山頭壇上主的會幕前，

⁴⁰ 逐日早暗佇祭壇頂獻燒化祭互上主，攏照上主命令以色列人的律法所有的記載。

⁴¹ 猶有希幔、耶杜頓，及其他受選，名有登錄的人，及𪜶做夥稱讚上主，因為伊的慈愛永遠存續。

⁴² 希幔、耶杜頓及𪜶做夥用喇叭、鈸，及謳咾上帝的樂器稱讚上主；耶杜頓的後代做守衛。

⁴³ 後來，全體人民就倒去𪜶兜；大闢嘛倒去，給伊的家族祝福。