歷代志上卷 12 - 現代台語譯本漢字版

早期跟隨大闢的便雅憫人

¹ 大闢為著閃避基士的子掃羅，匿佇洗革拉的時，下面諸個勇士來到伊遐，幫贊伊交戰。

² 𪜶會用正手倒手射箭，挕石頭；攏是便雅憫人，是掃羅的親族：

³ 導頭的是亞希以謝，閣落去是約阿施，𪜶攏是基比亞人示瑪的子； 閣有亞斯瑪威的子耶薛及比力、比拉迦 亞拿突人耶戶

⁴ 基遍人伊施瑪雅 (三十人中的一個勇士，啲管理彼三十人)、耶利米、雅哈悉、約哈難 基底拉人約撒拔、

⁵ 伊利烏賽、耶利摩、比亞利雅、示瑪利雅 哈律弗人示法提雅

⁶ 可拉人以利加拿、伊示雅、亞薩列、約以謝、雅朔班

⁷ 基多人耶羅罕的子猶拉及西巴第雅。

跟隨大闢的迦得人

⁸ 迦得支族有幾若人來到曠野的要塞，歸順大闢。𪜶攏是勇猛的戰士，夯盾牌，攑槍，𠢕相刣；𪜶的面親像獅的面，𠢕走親像山裡的鹿。

⁹ 頭一個以謝珥，第二俄巴底亞，第三以利押，

¹⁰ 第四彌施瑪拿，第五耶利米，

¹¹ 第六亞太，第七以利業，

¹² 第八約哈難，第九以利薩巴，

¹³ 第十耶利米，第十一末巴奈。

¹⁴ 諸個攏是迦得支族的軍官；上細的一個抵一百，上強的一個抵一千。

¹⁵ 正月約旦河的水漲滿雙旁岸的時，𪜶過河，互所有住佇平原的人驚甲四散逃走。

跟隨大闢的便雅憫人及猶大人

¹⁶ 閣有便雅憫人及猶大人來大闢的要塞。

¹⁷ 大闢出去迎接𪜶，對𪜶講：「恁若好意來欲幫贊我，我歡迎恁及我聯盟；毋拘恁若欲將我此個無罪的人出賣互對敵，願咱列祖的上帝監察責罰。」

¹⁸ 彼時上帝的神臨到眾軍官的首領亞瑪賽，伊就講： 「大闢啊，阮是歸順你的； 耶西的子啊，阮是支持你的。 願你平安順利， 願幫贊你的嘛攏平安； 因為你的上帝幫贊你。」 大闢就接納𪜶，設立𪜶做游擊隊的隊長。

跟隨大闢的瑪拿西人

¹⁹ 大闢及非利士人做夥欲攻擊掃羅的時，有一寡瑪拿西人來歸順伊。後來𪜶無幫贊非利士人，因為非利士的領袖有參詳，叫大闢倒去，講：「伊真有可能提咱的頭殼去歸順伊的主人掃羅。」

²⁰ 大闢去洗革拉的時，有瑪拿西人的指揮官，押拿、約撒拔、耶疊、米迦勒、約撒拔、以利戶、洗勒太，攏來歸順伊。

²¹ 諸個人幫贊大闢對抗游擊隊，𪜶攏是勇猛的戰士，閣做軍官。

²² 彼時，逐日有人來欲幫贊大闢，伊的軍隊就親像上帝的軍隊赫呢強大。

大闢的軍隊

²³ 有武裝好勢的戰士來希伯崙見大闢，欲照上主的話將掃羅的王位交互伊。下面是許個戰士的數目：

²⁴ 猶大支族：夯盾牌，攑槍的武裝戰士，有六千八百人。

²⁵ 西緬支族：會出戰的勇士，有七千一百人。

²⁶ 利未支族：四千六百人；

²⁷ 亞倫後代的族長耶何耶大及隨伊的有三千七百人；

²⁸ 勇猛的戰士少年人撒督及伊家族的領袖二十二人。

²⁹ 便雅憫支族：掃羅的親族有三千人；前到今，𪜶大部分擁護掃羅家。

³⁰ 以法蓮支族：出名的勇猛戰士，有兩萬空八百人。

³¹ 約旦河西旁的瑪拿西半支族：有記錄佇家譜的，一萬八千人，攏擁護大闢作王。

³² 以薩迦支族：有智識，識時勢，知以色列佇什麼時著做什麼的領袖有兩百人；𪜶的親族攏聽𪜶的命令。

³³ 西布倫支族：會用逐種軍器出陣交戰，真有紀律，對大闢忠誠的有五萬人。

³⁴ 拿弗他利支族：有一千個領袖；攑槍，夯盾牌隨𪜶的，有三萬七千人。

³⁵ 但支族：會出戰的，有兩萬八千六百人。

³⁶ 亞設支族：會出陣交戰的，有四萬人。

³⁷ 佇約旦河東旁，呂便支族、迦得支族、瑪拿西半支族：攑逐種軍器交戰的，有十二萬人。

³⁸ 諸個戰士攏隨時會當出戰，對大闢忠誠。𪜶來到希伯崙擁護大闢做以色列全國的王；其他的以色列人嘛同心擁護大闢作王。

³⁹ 𪜶佇遐及大闢做夥三日，亦食亦飲，因為𪜶的親族攏給𪜶備辦好勢。

⁴⁰ 𪜶附近的人，甚至對以薩迦、西布倫、拿弗他利來的人，攏用驢、駱駝、騾、牛，載食物，有麵粉、無花果乾丸、葡萄乾丸、酒、油，閣帶牛羊來遐，逐項攏真多；因為佇以色列中有大歡喜。