撒母耳記下卷 9 - 現代台語譯本漢字版

大闢及米非波設

¹ 大闢問講：「掃羅的家猶有什麼人留啲？我欲因為約拿單的緣故好款待伊。」

² 掃羅的家有一個僕人叫做洗巴，人叫伊去大闢遐；王就問伊：「你是洗巴是無？」 伊應講：「你的僕人就是。」

³ 王講：「掃羅的家猶賰幾個人？我通將上帝的恩施互伊。」 洗巴對王講：「約拿單猶有一個子，伊的雙腳攏跛。」

⁴ 王問伊：「伊佇叨位？」 洗巴應王講：「伊佇羅‧底巴，住佇亞米利的子瑪吉𪜶兜。」

⁵ 大闢王就派人去瑪吉𪜶兜給導來。

⁶ 掃羅的孫，約拿單的子米非波設來見大闢，仆落去拜伊。大闢講：「米非波設。」伊應講：「你的僕人佇遮。」

⁷ 大闢講：「毋免驚。我一定欲因為你的老父約拿單的緣故好款待你，將你的阿公掃羅的田園攏還你，嘛欲互你常常及我做夥食。」

⁸ 米非波設閣仆啲拜伊，講：「你的僕人算什麼？我不過親像一隻死狗，你竟然按呢照顧我！」

⁹ 王叫掃羅的僕人洗巴來，給伊講：「我已經將掃羅及伊家族所有的財產攏互你的主人的孫。

¹⁰ 你及你的子、你的僕人著給伊種作，帶田園所出產的互你的主人的孫有物通食；你主人的孫米非波設會常常及我做夥食。」洗巴有十五個子、二十個僕人。

¹¹ 洗巴對王講：「我的主我的王吩咐的，你的僕人攏會照按呢做。」 所以，米非波設就及王做夥食，親像王的子仝款。

¹² 米非波設有一個細漢子，叫做米迦。洗巴𪜶兜所有的人攏做米非波設的僕人。

¹³ 米非波設兩腳攏跛，住佇耶路撒冷，常常及王做夥食。