撒母耳記下卷 8 - 現代台語譯本漢字版

上主互大闢得勝

¹ 後來，大闢攻擊非利士人，互𪜶降服；閣對非利士人的手提著京城的控制權。

² 大闢閣拍敗摩押人，叫𪜶倒佇土腳，用索量，量兩索長的互伊死，量一索的互伊活；摩押人就歸順大闢，閣進貢。

³ 利合的子瑣巴王哈大底謝去幼發拉底河，欲回復伊的統治權的時，大闢攻擊伊，

⁴ 掠伊的馬兵一千七百、步兵兩萬，閣斬斷戰車的馬的腳筋；只有留夠額通拖一百台戰車的馬。

⁵ 大馬士革的敘利亞人來幫贊瑣巴王哈大底謝，大闢就刣死敘利亞人兩萬兩千。

⁶ 對按呢，大闢佇大馬士革的敘利亞設立軍營。敘利亞人就歸順大闢，閣進貢。大闢無論去叨位，上主攏互伊得勝。

⁷ 大闢將哈大底謝的部下所用金的盾牌攏帶來耶路撒冷。

⁸ 大闢王閣對哈大底謝的城比他及比羅他，提真多銅。

⁹ 哈馬王陀以聽見大闢拍贏哈大底謝的全軍，

¹⁰ 就差伊的子約蘭帶金器、銀器、銅器去見大闢王，給伊請安，祝賀伊拍贏哈大底謝，因為哈大底謝及陀以常常交戰。

^11-12 大闢王就將諸個物，及以前伊刣贏列國所得著的金銀，就是對以東、摩押、亞捫人、非利士人、亞瑪力人，以及對利合的子瑣巴王哈大底謝得著的戰利品，攏聖化獻互上主。

¹³ 大闢佇鹽的山谷拍死以東人一萬八千；倒來的時，就得著大名聲。

¹⁴ 大闢佇以東全地設軍營；以東人攏歸順伊。大闢無論去叨位，上主攏互伊勝利。

¹⁵ 大闢做全以色列的王，用公平正義治理伊所有的人民。

¹⁶ 洗璐雅的子約押做元帥，亞希律的子約沙法做史官。

¹⁷ 亞希突的子撒督及亞比亞他的子亞希米勒做祭司；西萊雅做書記；

¹⁸ 耶何耶大的子比拿雅作頭指揮基利提人及比利提人。大闢的子攏做祭司。