撒母耳記下卷 7 - 現代台語譯本漢字版

上帝及大闢立約

¹ 王住佇王宮，上主互伊無受四圍對敵的攪擾，享受太平。

² 王對先知拿單講：「你看，我住佇柏香柴的宮殿，毋拘上帝的約櫃𫢶佇布棚。」

³ 拿單對王講：「你想欲按怎，就通去做，因為上主及你同在。」

⁴ 彼暝上主的話臨到拿單，講：

⁵ 「你去給我的僕人大闢講：『上主按呢講：你真正欲起聖殿互我住是無？

⁶ 對我導以色列人出埃及到現在，我毋曾住佇殿裡，攏一直住佇布棚抑是會幕，及𪜶做夥行徙。

⁷ 我及以色列人同行的時，豈曾對叨一個以色列支族的領袖，就是牧養我的子民的講：恁哪無給我起柏香柴的殿？』

⁸ 「今你著給我的僕人大闢講：『上主 — 萬軍的統帥按呢講：我對牧場揀召你，互你無閣飼羊，是欲互你做我的子民以色列的統治者。

⁹ 你無論去叨位，我會及你同在，消滅你面前所有的對敵。我一定互你有大名聲，親像世間的偉人赫呢出名。

^10-11 我欲為著我的子民以色列準備一個所在，給𪜶安頓，互𪜶徛起佇家己的所在，無閣受攪擾，無閣親像早前我命令士師管理我的子民以色列的時代，受兇惡的人欺壓。我欲互你脫離一切的對敵，得著太平。我閣宣布，我上主欲建立你的王朝。

¹² 到你的歲壽滿，轉去你的祖先遐的時，我欲選立你的後代，你的親生子，來續接你，閣欲互伊的國穩固。

¹³ 伊欲為著我的名起聖殿；我欲堅固伊的王位直到永遠。

¹⁴ 我欲做伊的父，伊欲做我的子。伊若犯罪，我欲用人的柺，世間人的鞭，責督伊。

¹⁵ 毋拘我的慈愛𣍐離開伊，𣍐親像我互慈愛離開我所棄拺的掃羅。

¹⁶ 你的家及你的國，會永遠堅立佇我的面前；你的王位會堅固到永遠。』」

¹⁷ 拿單就照上帝啟示的話攏給大闢講。

大闢的祈禱及感謝

¹⁸ 大闢王就入去會幕，坐佇上主的面前，講：「至高的上主，我是啥人，我的家算什麼，你竟然導我到此個地位？

¹⁹ 毋若按呢，至高的上主啊，你閣眷顧你奴僕的家的將來；至高的上主，這豈是一般人會當抵著的代誌？

²⁰ 至高的上主啊，你的奴僕你上清楚，我猶有什麼話通講？

²¹ 你有做諸個大事，閣教導你的奴僕；這攏是因為你的應允，照你的旨意。

²² 至高的上主啊，你真偉大！照阮所聽見，無一個會當及你比，你以外無上帝。

²³ 世間豈有一個國親像你的子民以色列？上帝你有救贖𪜶，互𪜶成做你的子民，互你家己得著榮耀；閣為著你對埃及解救出來的子民做大閣通驚的事，將列邦及許個神明趕出去。

²⁴ 你有建立以色列永遠做你家己的子民；上主啊，你閣做𪜶的上帝。

²⁵ 「主上帝，你對你的奴僕及伊的家的應允，願你照你所講的實現，互伊永遠穩固。

²⁶ 願人永遠尊崇你的名講：『上主 — 萬軍的統帥是治理以色列的上帝！』閣你的奴僕大闢的家欲佇你的面前堅立。

²⁷ 上主 — 萬軍的統帥、以色列的上帝啊，因為你有啟示你的奴僕，講『我欲建立你的王朝』，所以你的奴僕好膽用此個祈禱對你懇求。

²⁸ 「至高的上主，只有你是上帝！你的話真實可靠；你用此個福氣應允你的奴僕。

²⁹ 今，求你歡喜賜福你奴僕的家，互伊佇你的面前永遠穩固。至高的上主，因為你有應允，願你奴僕的家對你得著福氣，到永遠。」