撒母耳記下卷 6 - 現代台語譯本漢字版

接約櫃來耶路撒冷

¹ 大闢閣聚集以色列人中間特選的三萬人。

² 大闢導諸個人出發，去猶大的巴拉，欲對遐將上帝的約櫃接來；此個櫃是奉坐佇兩個天使基路伯中間的上主 — 萬軍的統帥的名稱呼的。

³ 𪜶將上帝的約櫃下佇新的車，對山頂亞比拿達的厝載出來；亞比拿達兩個子，烏撒及亞希約，趕彼台新車。

⁴ 𪜶將車及上帝的約櫃對山頂亞比拿達的厝載出來。亞希約行佇櫃的頭前。

⁵ 大闢及以色列全家，佇上主的面前用松樹柴所造逐款的樂器，及琴、瑟、玲瓏鼓、大鼓、鈸，來奏樂慶祝。

⁶ 𪜶到拿康的五穀場，牛著觸，烏撒伸手扶上帝的約櫃。

⁷ 上主對烏撒發大受氣；因為伊的失錯，上主給伊拍，伊就死佇上帝的約櫃邊。

⁸ 大闢因為上主拍烏撒，真無歡喜，就將彼個所在號做比列斯‧烏撒，直到今仔日。

⁹ 彼日，大闢驚上主，就講：「我哪通將上主的約櫃運來我的所在？」

¹⁰ 對按呢，大闢毋肯互上主的約櫃遷入大闢城，到家己的所在，就給伊徙去迦特人俄別‧以東的厝。

¹¹ 上主的約櫃停佇迦特人俄別‧以東的厝三月日久，上主賜福俄別‧以東及伊的全家。

¹² 有人給大闢王報告：「上主因為約櫃的緣故，賜福俄別‧以東及𪜶全家的人。」大闢就歡歡喜喜將上帝的約櫃，對俄別‧以東的厝接來大闢城。

¹³ 扛上主約櫃的人行六步，大闢就獻一隻牛及一隻肥的牲生做祭祀。

¹⁴ 大闢穿幼麻布的以弗得佇上主的面前盡力跳舞。

¹⁵ 按呢，大闢及以色列全家出歡喜的聲，歕哨角，扛上主的約櫃上來耶路撒冷。

¹⁶ 上主的約櫃入大闢城的時，掃羅的查某子米甲對窗仔看出去，看著大闢王佇上主面前亦跳亦趒，就看輕伊。

¹⁷ 𪜶扛上主的約櫃入去，下佇大闢為著約櫃搭的布棚內面；大闢佇上主面前獻燒化祭及平安祭。

¹⁸ 大闢獻諸個祭了後，就奉上主 — 萬軍的統帥的名給人民祝福。

¹⁹ 伊閣分物件互以色列眾人，無論男女，逐個人一塊餅、一塊肉、一粒葡萄乾丸。眾人就攏倒去𪜶兜。

²⁰ 大闢倒去欲給伊的家屬祝福，掃羅的查某子米甲出來接伊，講：「以色列王今仔日真有體面！今仔日佇人臣的女婢目睭前無穿衫，親像一個𤞚人露體毋知見笑。」

²¹ 大闢給米甲講：「我是佇上主的面前按呢做。伊有揀我，無揀你的老父抑是伊家內的人，選立我做上主的子民以色列的統治者。所以我會佇上主面前繼續跳舞。

²² 我欲比今仔日按呢閣較粗俗。雖然你看我做卑賤，毋拘你所講許個女婢會尊重我。」

²³ 對按呢，掃羅的查某子米甲到死攏無生子。