撒母耳記下卷 5 - 現代台語譯本漢字版

大闢作全以色列的王

¹ 以色列眾支族來希伯崙見大闢，講：「阮是你的骨肉。

² 較早掃羅做阮的王的時，導以色列去交戰的是你；上主嘛曾給你講：『你會牧養我的子民以色列，嘛會做以色列的統治者。』」

³ 以色列的長老攏來希伯崙見大闢王，王就佇希伯崙，佇上主的面前及𪜶立約。𪜶就用油抹大闢，設立伊做以色列的王。

⁴ 大闢坐位的時三十歲，作王四十年久。

⁵ 伊佇希伯崙做猶大王七年六個月；佇耶路撒冷做全以色列及猶大的王三十三年。

大闢攻佔耶路撒冷

⁶ 王及隨伊的人去到耶路撒冷，欲攻擊住佇遐的耶布斯人。耶布斯人對大闢講：「你無可能攻入來！阮連失明的、腳跛的都會當給你拍敗。」𪜶按算大闢一定𣍐當攻入來。

⁷ 毋拘大闢有攻取錫安的堡壘，就是現在的大闢城。

⁸ 彼日，大闢講：「人若欲拍耶布斯人，著對引水的磅孔上去，去拍大闢所怨恨許個腳跛的、失明的。」所以有俗語講：「失明的、腳跛的𣍐用得入去上帝的殿。」

⁹ 大闢住佇堡壘，給彼個所在號做大闢城。大闢對米羅向內面四圍起牆。

¹⁰ 大闢愈來愈強盛，因為上主 — 萬軍的統帥上帝及伊同在。

¹¹ 泰爾王希蘭派使者帶柏香柴，及作木師傅、拍石師傅去大闢遐，給大闢起宮殿。

¹² 大闢就知上主堅立伊做以色列王，閣為著上主的子民以色列互伊的國強盛。

¹³ 大闢離開希伯崙了後，娶耶路撒冷的女子做嬪妃，閣生後生及查某子。

¹⁴ 佇耶路撒冷生的子是沙慕亞、朔罷、拿單、所羅門、

¹⁵ 益轄、以利書亞、尼斐、雅非亞、

¹⁶ 以利沙瑪、以利雅大，及以利法列。

刣贏非利士人

¹⁷ 非利士人聽著大闢受抹油選立做以色列王，就全力上來追尋大闢。大闢聽著就落去堡壘。

¹⁸ 非利士人來，遍滿利乏音山谷。

¹⁹ 大闢問上主講：「我豈通進攻非利士人？你豈欲將𪜶交佇我的手？」 上主給大闢講：「你去，我一定會將非利士人交佇你的手。」

²⁰ 大闢來到巴力‧比拉心，佇遐給非利士人拍敗，講：「上主佇我的面前給我的對敵衝散，親像大水給堤岸沖破。」因為按呢，彼個所在就叫做巴力‧比拉心。

²¹ 非利士人逃走的時給𪜶的偶像擲佇遐；大闢及隨伊的人給許個偶像拾去。

²² 非利士人閣來，遍滿利乏音山谷。

²³ 大闢問上主。上主講：「毋通正面進攻，著踅去𪜶的後面，佇桑材樹林的頭前給𪜶攻擊。

²⁴ 你聽著樹尾有行軍的聲，就著趕緊進攻，因為彼時上主已經佇你的頭前攻擊非利士人的軍隊。」

²⁵ 大闢就照上主的命令去做，對迦巴攻擊非利士人直到基色。