撒母耳記下卷 3 - 現代台語譯本漢字版

¹ 掃羅的家及大闢的家交戰真久；大闢愈強盛，掃羅的家愈衰微。

大闢佇希伯崙生的子

² 大闢佇希伯崙生六個子：大子暗嫩，是耶斯列人亞希暖生的；

³ 第二個基利押，是迦密人拿霸的遺孀愛比該生的；第三個押沙龍，是基述王達買的查某子瑪迦生的；

⁴ 第四個亞多尼雅，是哈及生的；第五個示法提雅，是亞比她生的；

⁵ 第六個以特念，是大闢的某以格拉生的。諸個是大闢佇希伯崙所生的子。

押尼珥投靠大闢

⁶ 掃羅的家及大闢的家繼續啲交戰，押尼珥佇掃羅的家掌握實權。

⁷ 掃羅有一個妃，名叫利斯巴，是愛亞的查某子。伊施‧波設對押尼珥講：「你哪及我老父的妃做夥睏？」

⁸ 押尼珥因為伊施‧波設的話就真受氣，講：「你看我做猶大家的狗仔頭是無？我忠誠對待恁老父掃羅的家，及伊的兄弟、伊的朋友，無將你交佇大闢的手，你今仔日竟然因為此個婦仁人責備我。

^9-10 我若無照上主所立誓對大闢的應允來做，廢除掃羅家的王位，建立大闢的王權，互伊治理以色列及猶大，對但到別是巴，願上帝加倍責罰我押尼珥。」

¹¹ 伊施‧波設因為驚押尼珥，連一句話都毋敢應。

¹² 押尼珥差使者代表伊去見大闢，講：「此個國什麼人啲統治？」閣講：「你及我立約，我欲幫贊你，互全以色列攏歸順你。」

¹³ 大闢講：「好，我及你立約。毋拘我有一個要求，你來見我的時，著將掃羅的查某子米甲導來；若無，一定𣍐當見我的面。」

¹⁴ 大闢就差使者去見掃羅的子伊施‧波設，講：「著將我的某米甲還我，伊是我用一百個非利士人的包皮做聘金娶來的。」

¹⁵ 伊施‧波設就派人對米甲的丈夫，拉億的子帕鐵遐導米甲來。

¹⁶ 伊的丈夫隨佇伊的後面，那行那哮，到巴戶琳。押尼珥對帕鐵講：「倒去啦。」伊就倒去。

¹⁷ 押尼珥及以色列的長老參詳，講：「恁早就愛大闢作王給恁治理，

¹⁸ 今著採取行動。因為上主有應允講：『我欲用我的僕人大闢的手，救我的子民以色列脫離非利士人及所有對敵的手。』」

¹⁹ 押尼珥嘛將諸個話講互便雅憫人聽。後來伊去希伯崙，將以色列人及便雅憫全家共同的決定，講互大闢聽。

²⁰ 押尼珥導二十個人來希伯崙見大闢。大闢設宴席歡迎𪜶。

²¹ 押尼珥給大闢講：「我欲去招集全以色列來見我的主我的王，互𪜶及你立約，你就會當作王，照你的心願治理全國。」大闢就送押尼珥，互伊平安離開。

約押刣死押尼珥

²² 彼時，大闢的兵隨約押出戰倒來，帶真多戰利品。押尼珥已經無佇希伯崙 大闢遐，因為大闢有送伊平安離開。

²³ 約押及隨伊的全軍已經到，有人給約押講：「尼珥的子押尼珥有來見王，王嘛送伊平安離開。」

²⁴ 約押去見王講：「你哪按呢做？押尼珥來見你，你哪放伊去，互伊離開？

²⁵ 你知尼珥的子押尼珥來是欲騙你，愛知你的動靜，及你一切所做的代誌。」

²⁶ 約押對大闢遐出來，就派人去趇押尼珥。𪜶就對西拉的井給伊帶來；毋拘大闢毋知。

²⁷ 押尼珥轉來到希伯崙的時，約押導伊到城門內的城牆邊，假欲私下及伊講話，就對伊的腹肚揬落去，伊就死。這是因為伊有刣死約押的小弟亞撒黑。

²⁸ 後來大闢聽著，就講：「流尼珥的子押尼珥的血此個罪，及我以及我的國無關係，阮佇上主的面前是無辜的。

²⁹ 願彼個罪約押及𪜶老父全家家己擔；閣願約押的家不斷有人致著下消抑是痲瘋，有人無攑柺仔𣍐當行路，有人互刀刣死，抑是無通食。」

³⁰ 約押及伊的小弟亞比篩刣死押尼珥，是因為押尼珥佇基遍及𪜶交戰的時，刣死𪜶的兄弟亞撒黑。

埋葬押尼珥

³¹ 大闢命令約押及隨伊的人講：「恁著拆裂衫，穿麻衫，為著押尼珥啼哭。」大闢王嘛隨佇棺材後面。

³² 𪜶給押尼珥埋葬佇希伯崙。王倚押尼珥的墓啼哭，眾人嘛啼哭。

³³ 王為著押尼珥唱哀歌，講： 「押尼珥哪會親像戇人按呢死？

³⁴ 你的手無受捆縛，你的腳無銬鎖鍊； 你竟然死佇歹人的手頭。」 眾人閣為著押尼珥哀哭。

³⁵ 日頭猶未落山以前，眾人來勸大闢食飯，毋拘大闢咒誓講：「我若佇日落以前食飯抑是食別項物件，願上帝加倍責罰我。」

³⁶ 眾人知影此個代誌，攏感覺真好；王所做的，眾人攏看做好。

³⁷ 彼日，跟隨大闢的人及所有以色列人才知，刣死尼珥的子押尼珥毋是出佇王的意思。

³⁸ 王對伊的部下講：「恁豈毋知今仔日佇以色列中，死一個偉大的將領？

³⁹ 我雖然受抹油選立作王，毋拘今仔日猶無夠力；洗璐雅許個子比我較強。願上主照歹人所做的歹報應𪜶。」