撒母耳記下卷 24 - 現代台語譯本漢字版

大闢調查戶口

¹ 上主閣對以色列人受氣，激動大闢來對付𪜶，講：「去調查以色列及猶大的人口。」

² 王吩咐伊身邊的元帥約押講：「你去以色列逐個支族，對但到別是巴，點算人口，互我知全國人民的數目。」

³ 約押對王講：「願上主 — 你的上帝互全國人民增加百倍，閣互我的主我的王親目看見；毋拘我的主我的王是按怎愛欲做此個代誌？」

⁴ 王堅持伊的命令。約押及許個軍長就奉命出去，點算以色列的人口。

⁵ 𪜶過約旦河，佇迦得山谷中亞羅珥城的南旁紮營，對遐去雅謝；

⁶ 經過基列，到他停‧合示地區，閣到但‧雅安，踅到西頓；

⁷ 閣到泰爾堅固的城，及所有希未人以及迦南人的城；最後到猶大南旁的別是巴。

⁸ 𪜶行透全國，經過九個月閣二十日，倒轉來耶路撒冷。

⁹ 約押將點算的人數報告互王知。以色列人攑刀的戰士有八十萬，猶大人有五十萬。

¹⁰ 大闢點算人民的數目了後，心內自責。大闢對上主講：「我做此個代誌犯真大的罪。上主啊，求你除去你奴僕的罪，因為我按呢做真戇。」

¹¹ 大闢透早起來，上主的話臨到大闢的先見迦得先知，講：

¹² 「你去給大闢講，上主按呢講：『我用三項災禍互你揀一項，我就照按呢做。』」

¹³ 迦得來給大闢講：「你愛你的國飢荒七年？抑是互你的對敵追殺三個月？抑是愛你的國有瘟疫三日久？你著斟酌想，互我通回復差我來彼位。」

¹⁴ 大闢給迦得講：「我真為難，毋拘咱寧可互上主家己給咱刑罰，因為伊有豐盛的憐憫；我毋願陷落佇人的手。」

¹⁵ 上主就降瘟疫佇以色列，對但到別是巴，對清早到預定的時，人民總共死七萬人。

¹⁶ 當天使伸手欲滅耶路撒冷的時，上主改變心意，無欲繼續降此個災禍，就給啲執行毀滅的天使講：「停手！夠額啦！」彼時，上主的使者抵佇耶布斯人亞勞拿的五穀場。

¹⁷ 大闢看見殺害人民的天使，就對上主講：「上主啊，我有犯罪，背逆的是我；毋拘諸個無辜的人民有做什麼毋著？求你的手刑罰我及我的家族。」

大闢為上主起一座祭壇

¹⁸ 仝彼日，迦得來見大闢，對伊講：「你去耶布斯人亞勞拿的五穀場，佇遐為上主起一座祭壇。」

¹⁹ 大闢就照上主吩咐迦得的話上去。

²⁰ 亞勞拿看著對面有王及伊的人臣啲來，就出去，仆佇土腳拜王。

²¹ 亞勞拿講：「我的主我的王來僕人遮有什麼貴事？」 大闢講：「我來是欲買你此個五穀場，為上主起一座祭壇，互全國的瘟疫停止。」

²² 亞勞拿對大闢講：「我的主我的王，照你所看做好的攏提去獻。遮有牛，通做燒化祭，有拍五穀的器具及牛軛通做柴燒。

²³ 王啊，亞勞拿將諸個攏送互王。」亞勞拿閣對王講：「願上主 — 你的上帝接納你。」

²⁴ 王對亞勞拿講：「毋通，我欲照價錢給你買。我無愛用白白得著的物做燒化祭獻互上主 — 我的上帝。」大闢就用五百七十公克的銀買彼個五穀場及牛。

²⁵ 大闢佇遐為上主起一座祭壇，獻燒化祭及平安祭。按呢，上主聽𪜶為著全國的祈禱，瘟疫就佇以色列中停止。