撒母耳記下卷 23 - 現代台語譯本漢字版

大闢的遺言

¹ 下面是大闢的遺言。 耶西的子大闢， 就是得著高升， 雅各的上帝所選立， 以色列人人意愛的詩人講：

² 上主的神通過我傳達， 伊的話佇我的嘴。

³ 以色列的上帝有講， 以色列的石磐對我講： 用公義治理， 用敬畏上帝來治理的人，

⁴ 會親像無雲的清早抵仔出的日光， 落雨了後大地青草反射的光彩。

⁵ 我的家佇上帝面前豈毋是按呢？ 伊有及我立永遠的約， 逐項安排齊全閣穩固。 我所有的拯救及所有的願望， 伊攏給我成全。

⁶ 毋拘匪類攏會親像互人㧒确的刺仔， 人毋敢用手提；

⁷ 欲磕𪜶的人， 著用鐵器及槍柄； 佇遐刺仔一定互火燒滅。

大闢的勇士

⁸ 大闢的勇士的名單記佇下面： 哈革摩尼人約設‧巴設，嘛叫做伊斯尼人亞底挪，是三個勇士的首領，曾一遍拍死八百個人。

⁹ 第二個是亞何亞人朵多的子以利亞撒，伊是隨大闢三個勇士的一個。有一遍，非利士人聚集來攻擊以色列人，以色列人撤退，毋拘此三個勇士對非利士人嗆聲。

¹⁰ 以利亞撒起來拍非利士人，拍到手痠，手黏佇刀柄。彼日，上主互𪜶大勝利；軍兵倒轉來以利亞撒的後面，干焦啲搶戰利品。

¹¹ 第三個是哈拉人亞基的子沙瑪。有一日，非利士人佇一坵紅豆園集合排陣；以色列軍兵逃走。

¹² 沙瑪徛佇園中防守彼坵園，拍非利士人；上主互伊大勝利。

¹³ 收割的時，三十個首領中有三個落去亞杜蘭洞見大闢。非利士的軍隊佇利乏音山谷紮營。

¹⁴ 彼時，大闢佇要塞；非利士的軍隊駐在佇伯利恆。

¹⁵ 大闢用真渴慕的口氣講：「若有人會當去提伯利恆城門邊的井水互我飲，毋知偌仔呢好！」

¹⁶ 此三個勇士就衝過非利士人的營地，對伯利恆城門邊的井汲水，捾來互大闢。毋拘大闢毋飲，倒出來獻互上主，

¹⁷ 講：「上主啊，我哪通飲此個水？這豈毋是諸個用性命去換來的人的血？」所以大闢毋飲。這是此三個勇士做的代誌。

¹⁸ 洗璐雅的子，約押的小弟亞比篩是另外三個勇士的首領；伊曾攑槍刣死三百個人，就佇三個勇士中有名。

¹⁹ 伊是三個勇士中第一出名的，所以做𪜶的領袖；毋拘伊猶不及前彼三個勇士。

²⁰ 閣有甲薛人耶何耶大的子比拿雅；伊是勇士，有做真多大事：伊曾刣死摩押兩個強猛的勇士；閣佇落雪的時，落去坑內刣死一隻獅；

²¹ 閣刣死一個高大的埃及人。彼個埃及人手攑槍，比拿雅只有攑棍落去伊遐，搶伊的槍，用彼支槍給伊刣死。

²² 這是耶何耶大的子比拿雅所做的事，就佇三個勇士中有名。

²³ 伊比三十個勇士較有名望，毋拘不及前彼三個勇士。大闢有設立伊做侍衛長。

²⁴ 三十個勇士中有： 約押的小弟亞撒黑 伯利恆人朵多的子伊勒哈難

²⁵ 哈律人沙瑪及以利加

²⁶ 帕勒提人希利斯 提哥亞人益吉的子以拉

²⁷ 亞拿突人亞比以謝 戶沙人米本乃

²⁸ 亞何亞人撒們 尼陀法人瑪哈萊

²⁹ 尼陀法人巴拿的子希立 便雅憫支族基比亞人利拜的子以太

³⁰ 比拉頓人比拿雅 迦實溪人希太

³¹ 亞拉巴人亞比‧亞本 巴魯米人亞斯瑪威

³² 沙本人以利雅哈巴 雅善的一個子約拿單

³³ 哈拉人沙瑪及沙拉的子亞希暗

³⁴ 瑪迦人亞哈拜的子以利法列 基羅人亞希多弗的子以連

³⁵ 迦密人希斯羅 亞巴人帕萊

³⁶ 瑣巴人拿單的子以甲 迦得人巴尼

³⁷ 亞捫人洗勒 給洗璐雅的子約押攑軍器的比錄人拿哈萊

³⁸ 以帖人以拉及迦立

³⁹ 赫人烏利亞 共三十七人。