撒母耳記下卷 22 - 現代台語譯本漢字版

大闢凱旋的歌

¹ 上主救大闢脫離所有的對敵及掃羅的手了後，伊向上主唸此首詩：

² 上主是我的山巖，我的要塞，我的拯救者；

³ 是我的上帝，我的石磐，我欲倚靠伊； 伊是我的盾牌，救我的氣力，我的堡壘，我的避難所。 我的拯救者，你有救我脫離強暴。

⁴ 我求叫應該受稱讚的上主， 我就得著解救脫離對敵。

⁵ 死亡的大湧圍困我； 毀滅的大水互我驚。

⁶ 陰府的索捆縛我； 死亡的羅網網著我。

⁷ 我佇苦難中祈求上主， 對我的上帝求叫； 伊佇伊的殿內聽我的聲； 我的懇求有入伊的耳孔。

⁸ 伊受氣，地就搖泏； 天的根基嘛振動搖閣泏。

⁹ 對伊的鼻孔有煙淐出； 對伊的嘴有火發出， 連土炭嘛𤏸起來。

¹⁰ 伊搋開天，親身降臨； 伊腳下有厚厚的烏雲。

¹¹ 伊騎天使基路伯啲飛； 伊坐風的翼顯現。

¹² 伊用烏暗做伊隱密的所在， 用水及密雲圍起來做帳房。

¹³ 伊發出的光， 互炭𤏸起來。

¹⁴ 上主對天頂彈雷， 至高的上帝出聲。

¹⁵ 伊射箭，互對敵四散； 伊發出熠爁，互𪜶混亂。

¹⁶ 上主一下責備， 鼻孔的氣一下出， 海底就露出， 大地的根基嘛露現。

¹⁷ 伊對頂面伸手扭我， 對大水給我救出來。

¹⁸ 伊救我脫離兇猛的對敵， 脫離怨恨我的人； 因為𪜶比我較強。

¹⁹ 我抵著災難的時，𪜶來攻擊我； 毋拘上主是我的倚靠。

²⁰ 伊導我到開闊安全的所在； 伊救我，因為伊意愛我。

²¹ 上主因為我正直報答我， 因為我的所做清氣報賞我。

²² 我遵守上主的道路， 毋曾作歹離開我的上帝。

²³ 伊所有的命令我有遵守； 伊的規例我毋曾放拺。

²⁴ 我佇伊的面前無通指責； 我保守家己離開罪惡。

²⁵ 因為我正直，上主報賞我； 佇伊的目睭前，我的所做清氣。

²⁶ 慈愛的人，你用慈愛對待伊； 純全的人，你用純全對待伊；

²⁷ 清氣的人，你用清氣對待伊； 毋拘，奸詐的人，你用彎曲對待伊。

²⁸ 困苦的人，你解救伊； 自高的人，你敵視伊，給伊降低。

²⁹ 上主，你是我的燈； 上主給我的烏暗變做光明。

³⁰ 我因為倚靠你，會當攻破敵軍； 倚靠我的上帝，會當跳過城牆。

³¹ 此位上帝，伊的道路完全。 上主的話有過火鍛鍊； 倚靠伊的，伊做盾牌保護𪜶。

³² 上主以外，豈有別個上帝？ 阮的上帝以外，豈有石磐通倚靠？

³³ 此位上帝是我堅固的要塞； 伊引導我行安全的路。

³⁴ 伊互我的腳親像鹿𠢕走， 閣互我徛在佇高的所在。

³⁵ 伊訓練我的手𠢕交戰， 互我的手會開銅的弓。

³⁶ 你用盾牌解救我； 你的幫贊互我堅強。

³⁷ 你互我踏的地開闊安全； 我的腳毋曾踏脫。

³⁸ 我追我的對敵到趇著𪜶； 𪜶無滅亡，我𣍐倒轉。

³⁹ 我拍𪜶悿悿，互𪜶𬦰𣍐起來， 到𪜶倒佇我的腳下。

⁴⁰ 你賜我氣力互我𠢕交戰； 你互攻擊我的人攏降服佇我下面。

⁴¹ 你互我的對敵越轉身逃走， 閣互我剿滅怨恨我的人。

⁴² 𪜶求叫，無人救𪜶； 求叫上主，伊嘛無應。

⁴³ 我給𪜶搥到碎碎，親像地上的土粉， 給𪜶踐踏，親像街路的土糜。

⁴⁴ 你救我脫離反叛我的人民； 你保護我，互我做列邦的頭。 我毋識的人民會服事我；

⁴⁵ 外邦的人屈身投降， 𪜶一下聽著我的名就順服。

⁴⁶ 外邦的人失膽， 行出𪜶的陣地，準備欲作戰。

⁴⁷ 上主永遠活啲！ 願我倚靠的石磐受稱讚； 願救我的石磐 — 上帝受高舉。

⁴⁸ 伊就是為我申冤彼位上帝； 伊互眾人降服佇我腳下。

⁴⁹ 伊救我脫離我的對敵。 你提拔我高過攻擊我的人； 你救我脫離強暴的人。

⁵⁰ 上主啊，因為按呢我欲佇列邦中感謝你， 唱歌稱讚你的名。

⁵¹ 上主賜極大的救恩互伊設立的王， 施落慈愛互伊抹油選立的人， 互大闢及伊的後代，直到永遠。