撒母耳記下卷 21 - 現代台語譯本漢字版

掃羅的後代受處死

¹ 大闢在位的時有飢荒連續三年。大闢請問上主。上主講：「是因為掃羅及伊的家刣死基遍人，流𪜶的血。」

² 王就召基遍人來，對𪜶講話。(基遍人本來毋是以色列人，是亞摩利人留落來的。以色列人曾對𪜶咒誓，無欲刣𪜶；毋拘掃羅因為對以色列人及猶大人的熱心，熱切甲計謀欲給𪜶消滅。)

³ 大闢給基遍人講：「我著為恁做什麼？我著按怎給恁補償，通互恁祝福上主的子民？」

⁴ 基遍人講：「阮及掃羅以及伊的家的代誌毋是用金銀會當解決，嘛毋通因為阮的緣故害死任何一個以色列人。」 伊講：「恁講按怎，我就按呢做。」

⁵ 𪜶對王講：「掃羅計謀欲給阮剿滅，害阮佇全以色列境內無徛起的所在。

⁶ 請將伊七個查甫的子孫交互阮，阮欲佇上主的面前給𪜶吊佇基比亞，就是上主選立作王的掃羅的家鄉。」 王講：「我會將𪜶交互恁。」

⁷ 大闢王因為曾及掃羅的子約拿單指上主的名咒誓，所以毋甘將約拿單的子米非波設交互𪜶。

⁸ 王就將愛亞的查某子利斯巴給掃羅生的兩個子亞摩尼及米非波設，以及掃羅的查某子米拉給米何拉人巴西萊的子亞得列生的五個子，

⁹ 攏交互基遍人。基遍人就佇上主的面前給𪜶吊佇山頂。此七個人攏做夥死，彼時抵是開始收割大麥的時。

¹⁰ 愛亞的查某子利斯巴提粗麻布，佇石磐頂為家己搭棚仔住佇遐；對開始收割到落秋雨沃著身屍的期間，伊日時毋准飛鳥，暝時毋准走獸磕著許個身屍。

¹¹ 有人將愛亞的查某子，掃羅的妃利斯巴所做的事給大闢講。

¹² 大闢就去基列的雅比人遐，將掃羅及伊的子約拿單的骨骸提來。(非利士人佇基利波刣死掃羅的時，將掃羅及約拿單吊死佇伯‧善的廣場；基列的雅比人對遐偷提𪜶的屍體。)

¹³ 大闢對遐帶掃羅及伊的子約拿單的骨骸倒來，閣收拾彼七個受吊死的人的骨骸。

¹⁴ 人就將掃羅及伊的子約拿單的骨骸埋葬佇便雅憫地區的洗拉，掃羅的老父基士的墓。𪜶照王的命令做了後，上帝有聽𪜶為全國的祈禱。

攻打非利士人

¹⁵ 非利士人閣及以色列人交戰。大闢及伊的軍兵做夥落去攻打非利士人，大闢就真厭倦。

¹⁶ 有一個大漢族的人，叫做以實‧比諾，伊的槍的頭用銅做，重三公斤半，閣背新的刀，欲刣大闢。

¹⁷ 洗璐雅的子亞比篩保護大闢，拍死彼個非利士人。後來隨大闢的人對伊咒誓講：「對今仔日起，你毋通閣及阮出戰，才免以色列的燈化去。」

¹⁸ 後來，以色列人佇歌伯及非利士人交戰；彼時有戶沙人西比該刣死一個大漢族的人，名叫做撒弗。

¹⁹ 𪜶閣佇歌伯及非利士人交戰；伯利恆人睚珥的子伊勒哈難刣死迦特人歌利亞；伊的槍柄親像織布機的車心赫粗。

²⁰ 𪜶閣佇迦特交戰；佇遐有一個大漢人，兩支手各有六支指頭仔，兩支腳嘛各有六支腳指頭仔，共有二十四支；伊嘛是大漢族的後代。

²¹ 此個人對以色列的軍隊嗆聲的時，大闢的兄哥示米亞的子約拿單給伊刣死。

²² 此四個人是迦特大漢族的後代；𪜶攏互大闢及伊的軍兵刣死。