撒母耳記下卷 2 - 現代台語譯本漢字版

大闢受抹油做猶大王

¹ 後來，大闢問上主講：「我上去猶大的一個城好無？」 上主給伊講：「好，通去。」 大闢講：「我著上去叨一個城？」 上主講：「去希伯崙。」

² 大闢就及伊兩個某，就是耶斯列人亞希暖及迦密人拿霸的遺孀愛比該，攏上去遐。

³ 大闢嘛導跟隨伊的人及𪜶的家眷做夥上去；𪜶就住佇希伯崙許個城。

⁴ 猶大人來遐，用油抹大闢做猶大家的王。 有人給大闢講，埋葬掃羅的是基列的雅比人。

⁵ 大闢就差使者去見基列的雅比人，給𪜶講：「願上主賜福恁，因為恁有用忠誠對待恁的主掃羅，給伊埋葬。

⁶ 願上主用仁慈誠實款待恁；我嘛欲答謝恁，因為恁有做此個代誌。

⁷ 恁著堅強勇敢，因為恁的主掃羅已經死。今，猶大家嘛已經用油抹我做𪜶的王。」

伊施波設做以色列的王

⁸ 掃羅的元帥，尼珥的子押尼珥，導掃羅的子伊施‧波設過去瑪哈念，

⁹ 設立伊作王治理基列、亞設、耶斯列、以法蓮、便雅憫，及所有的以色列人。

¹⁰ 掃羅的子伊施‧波設四十歲做以色列王，坐位兩年。毋拘，猶大家隨大闢。

¹¹ 大闢佇希伯崙做猶大家的王，總共七年六個月。

掃羅家及大闢家的戰爭

¹² 尼珥的子押尼珥及掃羅的子伊施‧波設的人臣，對瑪哈念去基遍。

¹³ 洗璐雅的子約押及大闢的人臣嘛出去，及𪜶佇基遍的水池邊相抵；一隊坐佇水池的此旁，一隊坐佇水池的彼旁。

¹⁴ 押尼珥對約押講：「咱來叫少年人佇咱的面前決鬥。」 約押講：「好，互𪜶出來。」

¹⁵ 𪜶就點人數，派少年人過去；屬掃羅的子伊施‧波設的便雅憫人十二名，大闢的部下嘛十二名。

¹⁶ 𪜶逐個扭對方的頭殼，用刀揬入對方的脇下；按呢，二十四個做一下倒落去，攏死。所以，基遍彼個所在叫做希利甲‧哈素林。

¹⁷ 彼日的交戰真劇烈；押尼珥及以色列人互大闢的部下拍敗。

¹⁸ 佇遐有洗璐雅三個子，約押、亞比篩、亞撒黑；亞撒黑親像野鹿赫呢𠢕走。

¹⁹ 亞撒黑追趇押尼珥；直直趇，無偏左，無偏右。

²⁰ 押尼珥越頭看，講：「亞撒黑啊，是你抑毋是？」 應講：「著！」

²¹ 押尼珥給伊講：「你斡去別位，掠一個少年人，剝伊的軍服。」毋拘亞撒黑直直給追，毋肯越走。

²² 押尼珥閣給伊講：「你越走毋通趇我。我哪著給你刣死？若給你刣死，我哪有面通見恁兄哥約押？」

²³ 亞撒黑毋肯越走；押尼珥就用槍倒插伊的腹肚，槍迵過伊的尻脊骿，伊就倒落去，死佇遐。所有來到亞撒黑死的所在的人，攏停落來徛佇遐。

²⁴ 約押及亞比篩追押尼珥。日落的時，𪜶趇到迵基遍曠野的路邊，基亞對面的亞瑪山。

²⁵ 便雅憫人聚集隨押尼珥，成做一陣，徛佇山頂。

²⁶ 押尼珥叫約押講：「咱豈通永遠刣𣍐煞？你豈毋知結局會真痛苦？你到底時才欲互跟隨你的人倒去，無閣趇𪜶的兄弟？」

²⁷ 約押講：「我指永活的上帝咒誓，若毋是你按呢講，我的部下就會趇𪜶的兄弟到天光。」

²⁸ 對按呢，約押歕哨角，跟隨的人就停啲，無閣追趇以色列人，嘛無閣交戰。

²⁹ 押尼珥及隨伊的人歸暝行軍，行過亞拉巴，過約旦河，行歸早起才到瑪哈念。

³⁰ 約押無閣趇押尼珥，就倒來，聚集所有隨伊的人。亞撒黑以外，大闢的兵減十九人。

³¹ 毋拘大闢的兵拍死便雅憫人及隨押尼珥的人，總共三百六十人。

³² 𪜶扛亞撒黑去伯利恆，給伊埋葬佇𪜶老父的墓。約押及隨伊的人歸暝行軍，到希伯崙的時，天抵仔光。