撒母耳記下卷 17 - 現代台語譯本漢字版

戶篩破壞亞希多弗的計策

¹ 亞希多弗對押沙龍講：「請准我揀一萬兩千人，今暗起身追趇大闢。

² 我趁伊厭倦失志，給伊攻擊，互伊驚惶失膽，隨伊的人攏會逃走。我干焦欲刣死王一個人，

³ 互人民攏歸順你。你所欲刣彼個人以外，所有的人民攏會平安。」

⁴ 押沙龍及以色列所有的長老攏贊成此個提議。

⁵ 押沙龍講：「召亞基人戶篩來，咱嘛來聽伊的意見。」

⁶ 戶篩到押沙龍遐，押沙龍對伊講：「亞希多弗按呢提議，咱照伊講的去做好無？若無，你有什麼意見？」

⁷ 戶篩對押沙龍講：「亞希多弗此遍的計策毋好。」

⁸ 戶篩閣講：「你知你的老父及隨伊的人攏是勇士。𪜶凝心掠狂，親像子互人搶去的熊母。閣你的老父是有經驗的戰士，一定𣍐及軍兵做夥歇睏。

⁹ 現在伊一定匿佇山洞抑是別個所在。若有人代先互伊刣死，聽著的人會講：『隨押沙龍的軍兵互人刣死啦。』

¹⁰ 彼時，連勇猛親像獅的人，心嘛會消熔失膽；因為以色列人攏知你的老父是勇士，隨伊的人嘛攏真勇敢。

¹¹ 所以我提議，著互親像海邊的沙赫呢多的以色列人，對但到別是巴聚集來你遮，你嘛親身導𪜶出戰。

¹² 按呢，咱無論佇什麼所在抵著伊，給伊突擊，親像露水降落大地，互伊及隨伊的人無留甲一個。

¹³ 伊若撤退入一個城，所有的以色列人會帶索去彼個城，給城拖落山谷，佇遐連一塊石頭仔都尋無。」

¹⁴ 押沙龍及所有的以色列人攏講：「亞基人戶篩的計策比亞希多弗的較好。」上主決定欲破壞亞希多弗好的計策，通降災禍互押沙龍。

大闢接著警告逃脫

¹⁵ 戶篩給祭司撒督及亞比亞他講：「亞希多弗給押沙龍及以色列的長老出的計謀是按呢按呢；我出的計策是按呢按呢。

¹⁶ 現在恁著趕緊派人去給大闢報告，今暗毋通𫢶佇曠野的渡口，一定著過河，才免王及隨伊的人攏受剿滅。」

¹⁷ 彼時約拿單及亞希瑪斯𫢶佇隱‧羅結，毋敢入城，驚互人看著；𪜶啲聽候一個女婢對城內出來給𪜶通報，互𪜶通對大闢王報告。

¹⁸ 毋拘有一個少年人看著𪜶，就去給押沙龍報告；𪜶兩人趕緊走去巴戶琳某一個人的厝；彼個人的埕有井，𪜶兩人就落去遐匿。

¹⁹ 彼家的婦仁人用蓋蓋井口，頂面鋪麥仔，代誌就無漏洩。

²⁰ 押沙龍的部下來到婦仁人彼間厝，問伊講：「亞希瑪斯及約拿單佇叨位？」 婦仁人講：「𪜶過溪去啦。」 許個部下去尋，尋無著，就倒去耶路撒冷。

²¹ 𪜶離開了，彼兩個人對井裡起來，去給大闢王通報。𪜶對大闢講：「恁著起來，趕緊過河，因為亞希多弗有按呢按呢計謀欲害你。」

²² 大闢及隨伊的人就起來，過約旦河；到天光，無一個無過約旦河。

²³ 亞希多弗知伊的計策無受採納，就騎驢倒去伊的城，到𪜶兜。伊給厝內的代誌交代好勢，就家己吊死；人給伊埋葬佇𪜶老父的墓。

²⁴ 大闢到瑪哈念的時，押沙龍及隨伊的以色列人才過約旦河。

²⁵ 押沙龍設立亞瑪撒做元帥代替約押。亞瑪撒是以色列人以特拉的子；以特拉曾及拿轄的查某子愛比該同房。此個愛比該及約押的老母洗璐雅是姊妹。

²⁶ 以色列人及押沙龍佇基列地區紮營。

²⁷ 大闢到瑪哈念彼時，亞捫族的拉巴人拿轄的子朔比、羅‧底巴人亞米利的子瑪吉，及基列的羅基琳人巴西萊，

²⁸ 帶床舖、盆、瓷器、小麥、大麥、麵粉、焙熟的五穀、豆仔、紅豆、焙過的豆仔、

²⁹ 蜜、油、牛奶及羊奶做的食物，供給大闢及隨伊的人；𪜶講：「軍兵佇曠野一定會枵，會厭倦，嘴焦。」