撒母耳記下卷 16 - 現代台語譯本漢字版

大闢及洗巴

¹ 大闢過山頂無偌遠，米非波設的僕人洗巴來迎接；伊牽兩隻掛鞍的驢仔，載兩百塊餅、一百粒葡萄乾丸、一百粒無花果乾丸，及一皮囊的酒。

² 王問洗巴講：「你是按怎帶諸個來？」 洗巴講：「驢是欲互王的家眷騎，餅及熟的果子欲互少年人食，酒欲互佇曠野厭倦的人飲。」

³ 王問講：「你的主人掃羅的孫佇叨位？」 洗巴應王講：「伊猶佇耶路撒冷，因為伊講：『以色列人今仔日欲將我的阿公的國還我。』」

⁴ 王給洗巴講：「米非波設所有的攏賜互你。」 洗巴講：「我謙卑仆拜；願我得著我的主我的王的恩典。」

大闢及示每

⁵ 大闢王到巴戶琳的時，有掃羅家族一個人，基拉的子示每出來，那行那咒詛，

⁶ 閣拾石頭抌大闢王及伊的人臣；彼時跟隨王的人及勇士攏佇王的左右。

⁷ 示每咒詛講：「你此個流人的血的兇手，你此個歹人，去死！

⁸ 你搶掃羅的王位，上主將你流伊家族的血的罪攏歸佇你，將此個國交互你的子押沙龍。今你抵著惡報，因為你是流人的血的兇手。」

⁹ 洗璐雅的子亞比篩給王講：「此隻死狗，哪通互伊咒詛我的主我的王？准我過去，斬伊的頭。」

¹⁰ 王講：「恁諸個洗璐雅的子，這無恁的代誌。出在伊咒詛，因為是上主吩咐伊咒詛我；所以無人會當講伊是按怎按呢做。」

¹¹ 大闢閣給亞比篩及王的人臣講：「我的親生子都數想我的性命，何況此個便雅憫人！出在伊咒詛，因為是上主教伊按呢做。

¹² 豈採上主帶念我的苦境，會施恩互我來代替今仔日的咒詛。」

¹³ 大闢及隨伊的人繼續行。示每行佇對面的山坪，那行那咒詛，閣抌石頭，撒土粉。

¹⁴ 王及隨伊的人到一個所在；𪜶攏真厭倦，就佇遐歇睏。

押沙龍佇耶路撒冷

¹⁵ 押沙龍及隨伊的以色列人民來到耶路撒冷，亞希多弗嘛及伊做夥。

¹⁶ 大闢的朋友亞基人戶篩來押沙龍遐，對押沙龍講：「願王萬歲！願王萬歲！」

¹⁷ 押沙龍給戶篩講：「你按呢做，對你的朋友豈有忠誠？你哪無及你的朋友做夥去？」

¹⁸ 戶篩給押沙龍講：「毋是按呢，上主及以色列人民所選的，我欲歸順伊，嘛欲隨伊。

¹⁹ 閣一項，我著服事啥人？豈毋是著服事王的子？我按怎服事你的老父，嘛欲按呢服事你。」

²⁰ 押沙龍給亞希多弗講：「恁著出計策，看咱閣來著按怎做。」

²¹ 亞希多弗給押沙龍講：「你去及你的老父留落來顧王宮許個嬪妃做夥睏；以色列的眾人知你敢惹你的老父受氣，許個歸順你的人會閣較堅決。」

²² 𪜶就給押沙龍佇王宮的厝頂搭布棚。押沙龍就佇以色列眾人面前入去，及伊的老父的嬪妃睏。

²³ 彼時亞希多弗所提出的計策，親像對上帝來的話；因為按呢，亞希多弗的意見攏受大闢及押沙龍尊重。