撒母耳記下卷 15 - 現代台語譯本漢字版

押沙龍造反

¹ 諸個代誌了後，押沙龍為家己準備馬及戰車，閣派五十個兵佇頭前開路。

² 押沙龍常常早早起來，徛佇城門口的路邊；若有人有案件欲互王判斷，押沙龍就叫伊來，問伊講：「你是叨一個城的人？」伊應講：「僕人是以色列某一個支族的人。」

³ 押沙龍給伊講：「你的案件合情合理，毋拘王無交代人處理你的案件。」

⁴ 押沙龍閣講：「可惜無人指派我做此個地的審判官；若有人有相告著審判的案件，來我遮，我會照公道判決。」

⁵ 若有人來拜伊，伊就伸手牽伊，給伊唚。

⁶ 以色列人的中間，若有人欲去見王請求判斷，押沙龍攏按呢對待𪜶。押沙龍用按呢暗中得著以色列人的心。

⁷ 四年後，押沙龍對王講：「求你准我去希伯崙，互我通對上主謝願。

⁸ 因為僕人住佇敘利亞的基述的時有下願講：『上主若互我閣倒來耶路撒冷，我欲去希伯崙服事上主。』」

⁹ 王給伊講：「你通平安去。」押沙龍就出發，去希伯崙。

¹⁰ 押沙龍暗中派使者去以色列逐個支族，講：「恁一下聽著哨角的聲，就喝講：『押沙龍佇希伯崙作王啦！』」

¹¹ 毋拘押沙龍對耶路撒冷所請及伊去彼兩百個人，攏毋知代誌的頭尾。

¹² 押沙龍獻祭的時，派人去基羅城請大闢的參謀亞希多弗來；對按呢，隨押沙龍的人愈來愈多，反叛的勢面愈來愈強。

大闢逃難

¹³ 有人來給大闢報告講：「以色列人的心攏歸向押沙龍啦。」

¹⁴ 大闢對許個及伊佇耶路撒冷的人臣講：「起來，咱著逃走；若無，咱𣍐當逃避押沙龍。著趕緊走，才免伊連鞭趇著咱，傷害咱，刣死城內的人。」

¹⁵ 王的人臣給王講：「阮的主阮的王所決定的，你的僕人攏欲照按呢做。」

¹⁶ 王出城，伊的家眷攏隨佇伊的後面，只有留十個嬪妃顧王宮。

¹⁷ 城內的人嘛隨王離開；𪜶行到城的最後一間厝停啲。

¹⁸ 王的人臣攏佇伊的面前行過去；所有的基利提人、比利提人，及對迦特隨伊來彼六百個迦特人，嘛攏佇王的面前行過去。

¹⁹ 王給迦特人以太講：「你是按怎欲及阮去？著倒去倚新王；你是外國人，對你的本國逃難來遮。

²⁰ 你昨昏才來，今仔日我家己都毋知欲去叨位，哪通互你及阮做夥飄流？轉去，給你的兄弟做夥導倒去。願上主用慈愛信實對待你。」

²¹ 以太應王講：「我指永活的上主佇我的主我的王面前咒誓，王無論佇什麼所在，你的僕人無論死活攏會佇遐。」

²² 大闢給以太講：「好，你進前行。」迦特人以太及許個隨伊的人，及所有的囝仔就攏過去。

²³ 跟隨王的人過去的時，所有的人攏大聲啼哭。王過汲淪溪谷，人民嘛過去，向迵曠野的路行去。

²⁴ 看咧，祭司撒督來啦，所有隨伊的利未人嘛扛上帝的約櫃來。𪜶將上帝的約櫃下佇遐。亞比亞他嘛來到遐，聽候對城內出來的人民攏過去。

²⁵ 王給撒督講：「你扛上帝的約櫃倒去城內。我若得著上主的恩典，伊會互我倒來，互我閣看著約櫃，及囥約櫃的所在。

²⁶ 上主若講：『我無合意你。』願伊照伊的意思對待我。」

²⁷ 王閣給撒督講：「你豈毋是先見？你通平安倒去城內；你的子亞希瑪斯及亞比亞他的子約拿單，攏通及你做夥倒去。

²⁸ 我會佇曠野的渡口聽候恁報消息互我。」

²⁹ 撒督及亞比亞他就扛上帝的約櫃倒去耶路撒冷；𪜶就留佇遐。

³⁰ 大闢對向橄欖山的路上去，蓋頭褪赤腳，那行那哮；隨伊去的人嘛蓋頭上去，那行那哮。

³¹ 有人報大闢講：「亞希多弗嘛隨押沙龍佇叛黨的中間。」大闢講：「上主啊，求你互亞希多弗的計謀落空。」

³² 大闢上到山頂敬拜上帝的所在的時，亞基人戶篩拆裂衫，頭殼糝土粉，來迎接伊。

³³ 大闢給伊講：「你若及我去，會拖累我；

³⁴ 你若倒去城內，給押沙龍講：『王啊，我欲做你的僕人；我以前做你老父的僕人，今我嘛欲按呢做你的僕人。』按呢你就會當替我破壞亞希多弗的計謀。

³⁵ 祭司撒督及亞比亞他嘛會及你佇遐。你佇王宮所聽著的，著給祭司撒督及亞比亞他講。

³⁶ 撒督的子亞希瑪斯，亞比亞他的子約拿單，嘛及𪜶佇遐；恁所聽著的，著交代𪜶來報我。」

³⁷ 對按呢，押沙龍入耶路撒冷的時，大闢的朋友戶篩嘛入城。