撒母耳記下卷 14 - 現代台語譯本漢字版

約押安排押沙龍轉來

¹ 洗璐雅的子約押知王的心猶啲想押沙龍，

² 就派人去提哥亞，叫一個聰明的婦仁人來。約押給伊講：「請你裝做帶孝的婦仁人；穿麻衫，身軀毋通抹油，假做已經為著死人哀傷幾若日。

³ 然後你入去見王，照我交代你的對王講。」約押就將所著講的話教婦仁人。

⁴ 提哥亞的婦仁人來見王，面仆佇土腳拜，講：「王啊，救我。」

⁵ 王問伊講：「你有什麼代誌？」伊應講：「我是一個寡婦，我的丈夫已經死。

⁶ 女婢有兩個子，𪜶兩個佇園裡相拍，無人給𪜶排解；一個拍死另外一個。

⁷ 現在全家族攏啲攻擊你的女婢，講：『你著將彼個拍死兄弟的交出來，阮欲互伊死，賠伊拍死兄弟的性命，絕伊的後嗣。』按呢𪜶欲將我賰的火種拍化，互我的丈夫𣍐當留名留後代佇世間。」

⁸ 王給婦仁人講：「你通倒去，我會為著你下令。」

⁹ 提哥亞的婦仁人閣對王講：「我的主我的王，願此個罪歸佇我及我的家族；及王以及王位攏無關係。」

¹⁰ 王講：「若有人給你加講話，你給導來我遮，伊就𣍐閣共你。」

¹¹ 婦仁人講：「願王記念上主 — 你的上帝，毋通互阮親族中報血仇的閣刣死我的子，才免𪜶滅絕我的後嗣。」 王講：「我指永活的上主咒誓，你的子，連一支頭毛都𣍐加落佇土腳。」

¹² 婦仁人講：「求你允准你的女婢對我的主我的王閣講一句話。」 王講：「做你講。」

¹³ 婦仁人講：「王是按怎按呢計謀欲攻擊上帝的子民？王若無互彼個逃命的子倒來，王抵即講的話，表示家己有毋著。

¹⁴ 咱攏一定會死，親像水潑落地，𣍐當閣收倒轉；毋拘上帝𣍐搶奪人的性命，會設法互逃命的人免永遠受趕逐離開伊。

¹⁵ 我將諸個話給我的主我的王講，是因為有人給我恐嚇，所以女婢想講著互王知，豈採王會聽女婢的訴求。

¹⁶ 有人欲將我及我的子對上帝所賜的產業做一下除滅。毋拘王會聽，會救伊的女婢脫離彼個人的手。

¹⁷ 女婢想，我的主我的王會安慰我，因為我的主我的王親像上帝的使者，會分別是非。願上主 — 你的上帝及你同在。」

¹⁸ 王應婦仁人講：「我欲問你的，你著照實講。」 婦仁人講：「請我的主我的王講。」

¹⁹ 王講：「諸個攏是約押及你套好的是無？」 婦仁人講：「我的主我的王，我指你的活命咒誓，抵照我的主我的王講的，是，是你的僕人約押吩咐我，教我講的。

²⁰ 你的僕人約押按呢做，是欲互此個代誌改變；我的主有親像上帝使者的智慧，會了解世間所有的事。」

²¹ 後來，王給約押講：「此件事我答應你。今你去，給彼個少年人押沙龍導倒來。」

²² 約押仆佇土腳拜，給王祝福。約押講：「我的主我的王有答應你僕人的請求。今仔日你的僕人知我有得著你的歡喜。」

²³ 對按呢約押出發去基述，導押沙龍轉來耶路撒冷。

²⁴ 王講：「叫伊倒去伊的厝，毋通見我的面。」押沙龍就倒去家己的厝，無見王的面。

大闢赦免押沙龍

²⁵ 佇以色列中，無人親像押沙龍赫呢英俊得著人謳咾；對腳底到頭殼頂攏無缺點。

²⁶ 押沙龍逐年著剪一遍頭毛，因為伊的頭毛真重。伊剪起來的頭毛，照王的秤，大約兩公斤。

²⁷ 押沙龍生三個子，一個查某子；查某子名叫她瑪，是一個真媠的查某囝仔。

²⁸ 押沙龍住佇耶路撒冷滿兩年，無見著王的面。

²⁹ 押沙龍派人去叫約押，欲請伊去見王，毋拘約押毋肯來。押沙龍第二遍派人去叫，伊猶原毋來。

³⁰ 押沙龍對伊的部下講：「恁看，約押的園離我的園真近，有種大麥。恁去給放火燒。」押沙龍的部下就去放火燒約押的園。

³¹ 約押去押沙龍的厝，問伊講：「你的部下是按怎放火燒我的園？」

³² 押沙龍給約押講：「我派人請你來，是欲請你去見王，給伊講我哪著對基述倒來；我寧可留佇遐。今著互我去見王的面；我若有罪，伊通刣我。」

³³ 約押就去見王給伊轉達。王叫押沙龍來；押沙龍就來見王，佇王的面前仆佇土腳。王就唚押沙龍。