撒母耳記下卷 13 - 現代台語譯本漢字版

暗嫩及她瑪

¹ 大闢的子押沙龍有一個真媠的小妹，叫做她瑪；大闢另外一個子暗嫩戀慕伊。

² 暗嫩愛伊的小妹她瑪愛甲破病；因為伊是在室女，暗嫩家己知𣍐當對伊做什麼。

³ 暗嫩有一個朋友，叫做約拿達，是大闢的兄哥示米亞的子。約拿達此個人真奸巧。

⁴ 伊對暗嫩講：「王的子啊，你是按怎一日比一日消瘦無精神？豈𣍐當給我講？」 暗嫩給伊講：「我愛我的小弟押沙龍的小妹她瑪。」

⁵ 約拿達就對伊講：「你著倒佇眠床，假破病；你的老父若來看你，你通對伊講：『請互我的小妹她瑪來我遮，佇我看會著的所在準備食物，親手提互我食。』」

⁶ 暗嫩就倒啲，假破病；王來看伊；暗嫩就對王講：「請互我的小妹她瑪來我遮，給我做兩塊餅，我通對伊的手接來食。」

⁷ 大闢就派人去她瑪的厝，給伊講：「你去恁兄哥暗嫩遐，給伊準備食物。」

⁸ 她瑪就去伊的兄哥暗嫩的厝；彼時暗嫩倒佇眠床。她瑪佇伊看會著的所在撋麵粉，烘餅。

⁹ 她瑪將歸盤的餅下佇暗嫩的面前，毋拘伊毋食。暗嫩叫所有的人攏出去，𪜶就出去。

¹⁰ 伊給她瑪講：「你捧餅入來房間，親手提互我食。」她瑪就捧許個餅入去房間互伊的兄哥暗嫩。

¹¹ 伊捧去互暗嫩食的時，暗嫩給扭啲，講：「小妹啊，來及我睏。」

¹² 伊應講：「我的兄哥，毋通，毋通給我侮辱。佇以色列無應該做此款代誌。你毋通做此款見笑事。

¹³ 我，我欲按怎洗我的見笑？你，你佇以色列中會成做邪惡的戇人。我求你給王講，伊𣍐阻止我嫁互你。」

¹⁴ 總是暗嫩毋肯聽伊的話；暗嫩比伊較有力，就給伊強暴。

¹⁵ 了後，暗嫩厭惡她瑪；彼個厭惡的程度，比以前對伊的愛閣較大。暗嫩給伊講：「起來，出去！」

¹⁶ 伊給暗嫩講：「毋通按呢，你給我趕出去比給我侮辱閣較邪惡。」 毋拘暗嫩毋聽，

¹⁷ 叫侍候伊的僕人來，給伊講：「給此個查某囝仔趕出去；伊出去了後，給門閂起來。」

¹⁸ 暗嫩的奴僕就給伊拖出去；出去了，門就閂啲。 彼時她瑪穿彩色的衫，因為王猶未出嫁的查某子攏穿此款衫。

¹⁹ 她瑪糝火灰佇頭殼，拆裂所穿彩色的衫，用手𢯾頭殼，那行那哮。

²⁰ 伊的親兄哥押沙龍問伊講：「你的兄哥暗嫩給你侮辱是無？小妹啊，此陣你著恬恬，伊是你的兄哥，毋免為著此個事心艱苦。」她瑪就孤單傷心住佇伊的兄哥押沙龍的厝。

²¹ 大闢王聽著諸個事，非常受氣，毋拘無給暗嫩責備，因為伊是大子，大闢真給寵倖。

²² 押沙龍因為暗嫩侮辱伊的小妹她瑪，就怨恨暗嫩，無及伊講話。

押沙龍為小妹報仇

²³ 兩年後，押沙龍佇以法蓮附近的巴力‧夏瑣，倩人給伊剪羊毛。伊請王所有的子攏去。

²⁴ 押沙龍來見王，講：「你的僕人有倩人啲剪羊毛，請王及你的人臣，及你的僕人做夥來慶祝。」

²⁵ 王給押沙龍講：「我的子啊，毋通，阮毋通攏去，才免你開費傷傷重。」押沙龍再三邀請，王毋去，干焦給伊祝福。

²⁶ 押沙龍講：「若無，就互我的兄哥暗嫩及阮去。」 王講：「是按怎著愛伊及你去？」

²⁷ 押沙龍再三請求。王就允准暗嫩及王所有的子攏去。

²⁸ 押沙龍吩咐伊的部下講：「恁著注意，看暗嫩飲酒飲甲真爽快的時，我一下下令刣暗嫩，恁就給伊刣死。毋免驚；一切的後果我負責。恁著好膽勇敢去做。」

²⁹ 押沙龍的部下照押沙龍的命令刣暗嫩；王的子兒攏𬦰起來，騎家己的騾逃走。

³⁰ 𪜶猶佇路裡，就有風聲傳到大闢，講：「押沙龍刣死王所有的子，無留甲半個。」

³¹ 王就起來拆裂衫，倒佇土腳；王的人臣嘛拆裂衫，徛佇伊的身邊。

³² 大闢的兄哥示米亞的子約拿達給王講：「我的主，毋通想講王的子攏互押沙龍刣死；死的干焦暗嫩若定，因為對暗嫩侮辱伊的小妹她瑪彼日起，伊就已經有此個意思。

³³ 今我的主我的王，毋免為著王的子攏死此個風聲心艱苦。其實只有暗嫩死若定。」

³⁴ 彼時押沙龍已經逃走。 守望的人攑頭看，看著一大陣人對後面山坡的路落來。

³⁵ 約拿達給王講：「你看，王的子攏轉來啦，抵照你的僕人所講的。」

³⁶ 話抵仔講煞，王許個子就到，開聲啼哭；王及人臣嘛攏大聲啼哭。

³⁷ 押沙龍走去亞米忽的子基述王達買遐。大闢逐日為著伊的子傷心。

³⁸ 押沙龍走去基述，住遐三年。

³⁹ 對暗嫩的死，大闢王無閣赫呢悲傷，就無閣對押沙龍受氣。