撒母耳記下卷 12 - 現代台語譯本漢字版

拿單的信息及大闢的悔改

¹ 上主差拿單去見大闢；拿單到伊遐，給伊講：「佇某一個城有兩個人，一個好額，一個散赤。

² 好額的有牛羊真多；

³ 散赤的什麼都無，只有一隻伊買來飼的羊仔子；伊給飼，互彼隻羊仔子及伊的子兒做夥長大，做夥食，做夥飲，閣做夥睏，給看做親像家己的查某子。

⁴ 有一個出外人來好額人遐；好額人毋甘對家己的羊群牛群中掠一隻來招待人客，顛倒掠散赤人彼隻羊仔招待伊。」

⁵ 大闢對彼個好額人發大受氣，給拿單講：「我指永活的上主咒誓，做此個代誌的人著死；

⁶ 伊著賠四倍的羊仔，因為伊做此個事，無憐憫的心。」

⁷ 拿單對大闢講：「你就是彼個人！上主 — 以色列的上帝按呢講：『我選立你做以色列的王，救你脫離掃羅的手。

⁸ 我用你主人的厝宅互你，嘛將你主人許個某交互你，閣將以色列家及猶大家互你；諸個你若猶嫌無到，我會閣較多互你。

⁹ 你是按怎藐視上主的命令，行伊看做歹的代誌？你借亞捫人的刀刣死赫人烏利亞，互伊死佇戰場，閣娶伊的某做你的某。

¹⁰ 今刀劍欲永遠無離開你的家，因為你藐視我，娶赫人烏利亞的某做你的某。』

¹¹ 上主閣按呢講：『我欲互災禍對你家己的家起來攻擊你；我欲佇你的目睭前，將你許個某互你身邊的人，伊欲佇當頭白日及𪜶做夥睏。

¹² 你佇暗中做的代誌，我欲當頭白日，佇以色列眾人的面前互諸個代誌發生。』」

¹³ 大闢給拿單講：「我有得罪上主！」 拿單給大闢講：「上主已經除去你的罪，你𣍐致到死。

¹⁴ 總是因為你做此個代誌，大大藐視上主，所以你所生彼個子一定會死。」

¹⁵ 拿單就倒去𪜶兜。上主拍大闢及烏利亞的某生的嬰仔，嬰仔就破病真傷重。

¹⁶ 大闢就為著彼個子對上帝祈禱。大闢閣禁食，入去內面通暝倒佇土腳。

¹⁷ 伊宮內許個長老去到伊的身邊，欲給伊扶起來；毋拘伊毋肯，嘛無欲及𪜶做夥食。

¹⁸ 到第七日囝仔死；大闢的人臣毋敢給伊講囝仔死啦；因為𪜶講：「囝仔猶活啲，咱勸伊，伊都毋聽，若給伊講囝仔死去，伊毋知會按怎傷害家己？」

¹⁹ 大闢看著伊的人臣啲吱嘸吱茲，就知囝仔已經死。大闢問伊的人臣講：「囝仔死啊是無？」 𪜶講：「死去啊。」

²⁰ 大闢就對土腳起來，洗身軀，抹油，換衫，入去上主的殿敬拜。然後伊倒去伊的厝，吩咐人提食物來，伊就食。

²¹ 人臣問伊：「你哪會按呢做？囝仔活啲的時，你禁食啼哭；囝仔死，你反轉起來食。」

²² 大闢講：「囝仔猶活啲，我禁食啼哭，因為我想講，上主會憐憫我，互囝仔活啲。

²³ 今囝仔已經死，我禁食有啥路用？我豈會當互伊倒轉來？我會去伊遐，毋拘伊𣍐當轉來我遮。」

所羅門出世

²⁴ 大闢安慰伊的某拔示芭，及伊同房，伊就生一個子，給伊號名叫做所羅門；上主疼伊，

²⁵ 就託先知拿單給伊號名叫做耶底底亞。

大闢攻取拉巴城

²⁶ 約押攻打亞捫人的京城拉巴。

²⁷ 約押差使者去見大闢講：「我已經取著拉巴的水源地。

²⁸ 今你著聚集其他的軍兵來圍攻此個城，給伊佔領；驚了我取此個城，人會用我的名來叫此個城。」

²⁹ 大闢就召集所有軍兵去拉巴，給伊攻取。

³⁰ 伊提著米勒公頭殼頂的王冠，是用大約三十五公斤的金造的，閣有鑲寶石。人將此頂王冠戴佇大闢的頭殼。大闢對城內取真多財物，

³¹ 閣給城內的人民掠出來，互𪜶用鋸仔、鐵耙仔，及鐵的斧頭做苦工，閣佇瓦窯做苦工；大闢攏用此款方法對待亞捫許個城的人。後來，大闢及所有的軍兵倒去耶路撒冷。