撒母耳記下卷 11 - 現代台語譯本漢字版

大闢及拔示芭

¹ 隔年春天，列王出戰的時，大闢派約押及伊的部下，以及以色列全軍出去。𪜶刣贏亞捫人，圍攻拉巴城。大闢留佇耶路撒冷。

² 有一日黃昏的時，大闢對眠床起來，佇王宮的厝頂行來行去；對厝頂看著一個婦仁人啲洗浴；婦仁人生做真媠。

³ 大闢就差人去探聽彼個婦仁人。有人講：「伊是以連的查某子，赫人烏利亞的某拔示芭。」

⁴ 大闢差使者去導拔示芭來伊遐。彼時，婦仁人月經抵抵清氣，大闢及伊做夥睏。後來，伊就倒去𪜶厝。

⁵ 婦仁人懷孕，就差人給大闢講：「我有身啦。」

⁶ 大闢差人去給約押講：「你派赫人烏利亞來我遮。」約押就差烏利亞去見大闢。

⁷ 烏利亞來，大闢問伊約押好無，軍兵好無，交戰好勢無。

⁸ 大闢給烏利亞講：「你轉去恁兜歇睏。」烏利亞出王宮了後，王就送一份禮物互伊。

⁹ 毋拘烏利亞及伊主人的部下做夥睏佇王宮門口，無倒去𪜶兜。

¹⁰ 有人給大闢講烏利亞無轉去𪜶兜。大闢就問烏利亞：「你豈毋是對真遠轉來，是按怎毋倒去恁兜？」

¹¹ 烏利亞對大闢講：「約櫃，以及以色列及猶大全軍攏𫢶佇布棚；我的主約押及王的部下佇野外紮營；我哪通倒去厝裡飲食，及我的某同房？我指你的性命咒誓，我絕對無欲做此款代誌。」

¹² 大闢給烏利亞講：「你今仔日猶原住遮，明仔載我派你轉去。」烏利亞佇彼日及隔日留佇耶路撒冷。

¹³ 大闢請烏利亞來做夥飲食，互伊飲甲醉。天暗，烏利亞出去伊主人的部下遐，睏佇伊家己的毯仔，無倒去𪜶兜。

¹⁴ 隔早起，大闢寫一張批互約押，託烏利亞帶去。

¹⁵ 批內寫講：「著派烏利亞去前線上危險的所在；然後恁攏撤退，互伊戰死。」

¹⁶ 約押圍城的時，伊知對敵防衛上強的所在佇叨位，就派烏利亞去遐。

¹⁷ 城內的防衛軍出來及約押交戰；大闢的部下死幾若人，赫人烏利亞嘛戰死。

¹⁸ 約押派人去給大闢報告交戰的事。

¹⁹ 伊吩咐使者講：「你詳細報告交戰的事了後，

²⁰ 王若受氣，講：『恁進攻的時，哪會赫倚城牆？豈毋知對敵會對城牆頂射箭？

²¹ 以前什麼人拍死基甸的子亞比米勒？豈毋是一個婦仁人對牆頂㧒石磨的頂礅摃著伊的頭殼，互伊死佇提備斯？恁是按怎赫倚城牆？』你著講：『你的僕人赫人烏利亞嘛死。』」

²² 使者去，照約押所命令的給大闢報告。

²³ 使者對大闢講：「對敵比阮較強，出來野外攻擊阮，阮給𪜶拍到城門口。

²⁴ 射箭的人對牆頂射你的部下；王的部下死幾若人，你的部下赫人烏利亞嘛佇遐戰死。」

²⁵ 大闢給彼個使者講：「你著按呢給約押講：『毋免為著此個事心艱苦，因為戰爭攏有人會死佇刀下；你著盡力攻城，給城攻破。』你著按呢給約押鼓勵。」

²⁶ 烏利亞的某聽著伊的丈夫已經死，就為伊啼哭。

²⁷ 喪事結束，大闢就差人導拔示芭入宮。伊就做大闢的某，給大闢生一個子。總是上主對大闢做此個代誌真無歡喜。