撒母耳記下卷 10 - 現代台語譯本漢字版

大闢拍敗亞捫人及敘利亞人

¹ 後來，亞捫人的王拿轄死，伊的子哈嫩續接伊作王。

² 大闢講：「我欲好款待哈嫩，親像伊的老父拿轄好款待我按呢。」大闢因為哈嫩的老父死，就派人臣去慰問。 大闢的人臣到亞捫人境內的時，

³ 亞捫人的領袖給𪜶的主人哈嫩講：「大闢派人來慰問你，你想講伊真正尊敬你的老父噢？大闢派伊的部下來見你，豈毋是欲詳細偵探此個城，看欲按怎給咱征服？」

⁴ 哈嫩就掠大闢的人臣，給𪜶的嘴鬚剃一半，閣剪斷𪜶的衫下半截，互𪜶露出下體，然後趕𪜶倒去。

⁵ 有人對大闢報告，大闢就派人去接𪜶，因為𪜶感覺非常見笑。王講：「留𫢶耶利哥，聽候嘴鬚發長才倒來。」

⁶ 亞捫人知𪜶惹大闢受氣，就差人去倩伯‧利合及瑣巴的敘利亞人，步兵兩萬，及瑪迦王的人一千，陀伯人一萬兩千。

⁷ 大闢聽見，就派約押導所有勇猛的軍隊出去。

⁸ 亞捫人出來佇城門的頭前排陣；瑣巴及利合的敘利亞人、陀伯人，及瑪迦人另外佇野外排陣。

⁹ 約押看見伊的前後攏有對敵排陣，就對以色列精兵的中間閣再揀一寡勇士出來，排陣欲抵敵敘利亞人。

¹⁰ 約押將其他的兵士交互伊的小弟亞比篩，𪜶就面對亞捫人排陣。

¹¹ 約押對亞比篩講：「敘利亞人若比我較強，你著來幫贊我；亞捫人若比你較強，我會去幫贊你。

¹² 著堅強！著為咱的同胞及咱上帝的城勇敢出戰。上主會照伊看做好的去做。」

¹³ 約押導伊的軍隊進前及敘利亞人交戰；敘利亞人戰敗，就佇約押的面前逃走。

¹⁴ 亞捫人看著敘利亞人逃走，嘛佇亞比篩的面前逃走入城。約押就對亞捫人遐倒去耶路撒冷。

¹⁵ 敘利亞人看著家己刣輸以色列人，就重整軍隊。

¹⁶ 瑣巴王哈大底謝派人去幼發拉底河彼旁召敘利亞的軍隊來；𪜶就來到希蘭。哈大底謝的將軍朔法導軍隊來。

¹⁷ 有人報告大闢，伊就召集以色列全軍過約旦河，進軍到希蘭。敘利亞人排陣，及大闢交戰。

¹⁸ 敘利亞人刣輸以色列人；大闢刣死敘利亞的戰車兵七百人，馬兵四萬，閣將𪜶的將軍朔法刣死佇遐。

¹⁹ 哈大底謝屬下許個王看著𪜶刣輸以色列人，就及以色列講和，歸順𪜶。對按呢，敘利亞人就毋敢閣幫贊亞捫人。