撒母耳記下卷 1 - 現代台語譯本漢字版

大闢為著掃羅及約拿單哀傷

¹ 掃羅死了後，大闢刣贏亞瑪力人倒來，佇洗革拉住兩日。

² 第三日，忽然有一個人對掃羅的軍營來，衫拆破，頭殼糝土粉，到大闢遐，仆佇土腳拜伊。

³ 大闢問伊講：「你對叨位來？」 伊應講：「我對以色列的軍營逃走來。」

⁴ 大闢閣問伊：「代誌按怎？緊給我講。」 伊應講：「軍隊對戰場刣輸逃走，真多人戰死，連掃羅及伊的子約拿單嘛死。」

⁵ 大闢給彼個少年人講：「你按怎知掃羅及伊的子約拿單已經死？」

⁶ 給伊報告的少年人講：「我抵好去基利波山，看著掃羅倚佇伊的槍，有戰車馬兵趇倚伊。

⁷ 伊越頭看著我，就叫我；我應講：『我佇遮。』

⁸ 伊問我：『你是什麼人？』我應講：『我是亞瑪力人。』

⁹ 伊閣給我講：『請來我邊仔給我刣死。我猶活啲，毋拘真痛苦。』

¹⁰ 我就倚去，給伊刣死，因為我知伊倒落去，一定𣍐活；我就提伊頭殼的王冠及伊的手環，帶來我的主遮。」

¹¹ 大闢就拆裂衫，跟隨伊的人嘛按呢。

¹² 𪜶為著掃羅及伊的子約拿單、上主的子民及以色列家，悲哀啼哭，禁食到日暗，因為𪜶攏死佇刀下。

¹³ 大闢給對伊報告的少年人問講：「你是叨位的人？」 應講：「我是出外人的子，亞瑪力人。」

¹⁴ 大闢對伊講：「你親手刣死上主選立的王，哪𣍐驚？」

¹⁵ 大闢叫一個少年人，講：「來，去給刣死。」伊就去給彼個亞瑪力人刣死。

¹⁶ 大闢給伊講：「這是你家己做得來的，因為你親嘴作證講：『我刣死上主選立的王。』」

大闢為掃羅及約拿單作哀歌

¹⁷ 大闢作哀歌，追悼掃羅及伊的子約拿單。

¹⁸ 伊命令人將此首叫做「弓歌」的詩教猶大人唱。此首詩有記載佇雅煞珥記：

¹⁹ 以色列啊，你的尊榮者受刣佇山頭； 大英雄竟然倒落去！

²⁰ 毋通佇迦特宣布， 毋通佇亞實基倫的街路報揚， 才免非利士的查某囝仔歡喜， 無受割禮的人的查某子快樂。

²¹ 基利波山啊， 願你遐無雨，無露水， 土地拋荒無出產； 因為佇你遐勇士的盾牌受㧒确， 掃羅的盾牌無閣抹油。

²² 約拿單的弓無𠲿著對敵的血𣍐收回； 掃羅的刀無食著勇士的油𣍐入鞘。

²³ 掃羅及約拿單人人意愛，受人敬重； 生無分開，死無相離。 𪜶比鷹鳥較緊， 比獅較強。

²⁴ 以色列的查某子啊，著為掃羅啼哭！ 伊曾互恁穿朱紅色的媠衫， 互恁的衣服有黃金做妝飾。

²⁵ 勇士竟然倒佇戰場！ 約拿單受刣佇你的山頭！

²⁶ 我的兄弟約拿單啊，我為你哀傷； 你及我上親。 你對我的疼真奇妙， 贏過婦仁人的疼。

²⁷ 勇士竟然倒落去！ 武器嘛攏毀壞！