撒母耳記上卷 9 - 現代台語譯本漢字版

掃羅去尋撒母耳

¹ 有一個便雅憫支族的人，叫做基士，是亞別的子，洗羅的孫，比歌拉的曾孫，亞斐亞的元孫；伊是好額人。

² 伊有一個子，叫做掃羅，勇壯閣英俊。以色列人無一個會當及伊比；伊比別人較高一粒頭。

³ 掃羅的老父基士拍毋見幾若隻驢母。基士給掃羅講：「你導一個僕人去尋許個驢仔。」

⁴ 𪜶行透以法蓮山區、沙利沙地區、沙琳地區，後來到便雅憫地區，攏尋無。

⁵ 𪜶到蘇弗地區的時，掃羅給伊的僕人講：「咱轉來去。若無，老父無煩惱驢，煞煩惱咱。」

⁶ 僕人講：「等咧，此個庄社有一個上帝重用的人受大家敬重；伊所講的攏會實現；咱來去尋伊；無定著伊會給咱指示去叨位尋驢。」

⁷ 掃羅給僕人講：「咱若欲去見伊，有什麼通送伊？咱袋仔內已經無食物，嘛無禮物通送彼個上帝重用的人。咱猶有什麼無？」

⁸ 僕人閣應掃羅：「我有一塊細塊銀仔，通送互彼個上帝重用的人，請伊給咱講佇叨位會尋著驢仔。」

⁹ (以前以色列人欲求問上帝，會講：「咱來去尋先見。」較早的先見今仔日叫做先知。)

¹⁰ 掃羅給僕人講：「好，咱來去。」𪜶就去上帝重用的人住的城。

¹¹ 𪜶上山坪欲入城的時，抵著幾若個查某囝仔出來欲汲水，就問𪜶：「先見有佇遮無？」

¹² 查某囝仔應講：「有，伊佇遮；抵佇恁頭前。緊去，伊今仔日抵好來此個城，欲佇山頭壇為民眾獻祭。

¹³ 恁一下入城，佇伊猶未上山頭壇食祭物以前會尋著伊。因為民眾𣍐當先食，著等伊祝福祭物了後，受請的人才會當食。恁此陣去，就會尋著伊。」

¹⁴ 掃羅及伊的僕人就繼續行。𪜶欲入城的時，撒母耳抵抵向𪜶行來，欲出城去山頭壇。

¹⁵ 掃羅猶未到的前一日，上主已經給撒母耳啟示講：

¹⁶ 「明仔載此個時陣，我欲差一個人對便雅憫地區來你遮；你著給伊抹油，設立伊做我的子民以色列的統治者；伊會救我的子民脫離非利士人的手。我有看著我的子民的困苦，聽著𪜶哀求的聲。」

¹⁷ 撒母耳一下看著掃羅，上主就對伊講：「此個就是我給你講欲治理我的子民彼個人。」

¹⁸ 掃羅佇城門內行倚撒母耳，給伊問：「請問，先見的厝佇叨位？」

¹⁹ 撒母耳應掃羅講：「我就是先見。你先上去山頭壇。今仔日恁欲及我做夥食飯；明仔早起我會送你轉去；你啲煩惱的代誌我會給你講。

²⁰ 你三日前拍毋見許個驢仔，你毋免煩惱，已經尋著啦。以色列人所啲渴慕的是什麼人？豈毋是你及恁老父的家族？」

²¹ 掃羅應講：「我是便雅憫人，屬以色列人上細的支族；阮家族閣是便雅憫支族中上細的。你哪給我講諸個話？」

²² 撒母耳導掃羅及伊的僕人入去客廳，互𪜶佇所請的人中間坐大位；所請的人客大約有三十個。

²³ 撒母耳給煮食的講：「我交代你收起來彼份通捧出來。」

²⁴ 煮食的就將特選的大腿捧出來，下佇掃羅面前。 撒母耳講：「此份是為著你留的，請你食。佇我邀請人客的時，就預先準備，留到此個時陣。」彼日掃羅就及撒母耳做夥食。

²⁵ 𪜶對山頭壇落來，入城，撒母耳及掃羅佇厝頂講話。

撒母耳設立掃羅作統治者

²⁶ 透早天昲光的時，掃羅猶佇厝頂啲睏，撒母耳叫伊：「起來，我送你倒去。」掃羅就起來；伊及撒母耳兩人出去外面。

²⁷ 𪜶行到城的角頭，撒母耳給掃羅講：「叫僕人先去。」僕人就去。撒母耳閣講：「𫢶遮小等一下，我欲給你傳達上帝的話。」