撒母耳記上卷 8 - 現代台語譯本漢字版

以色列人要求設立王

¹ 撒母耳已經老，就設立伊兩個子做以色列的士師。

² 大子約珥及第二子亞比雅攏佇別是巴做士師。

³ 毋拘𪜶無學𪜶老父的模樣；𪜶貪不義之財，收賄賂，無照公道裁決。

⁴ 對按呢，以色列的長老攏聚集來拉瑪見撒母耳，

⁵ 給伊講：「你已經年老，你兩個子無學你的模樣。所以著設立一個王給阮治理，親像別個國家仝款。」

⁶ 撒母耳對𪜶要求一個王的事無歡喜。伊就對上主祈禱。

⁷ 上主對撒母耳講：「人民的要求，你著接受。𪜶毋是棄拺你，是棄拺我；𪜶無愛我做𪜶的王。

⁸ 對我導𪜶出埃及到今仔日，𪜶所做的攏是離開我，去服事別個神明，現在𪜶嘛按呢啲對待你。

⁹ 今𪜶的要求你著接受，毋拘著嚴嚴給𪜶警告，互𪜶知將來𪜶的王會按怎管轄𪜶。」

¹⁰ 撒母耳將上主的話攏給許個對伊要求一個王的人民講：

¹¹ 「將來恁的王會按呢管轄恁：伊會召恁的子去作兵，有的做戰車兵，有的做馬兵；𪜶走做前，做王的先鋒。

¹² 伊會派人做官長，有的管一千，有的管五十；嘛會派人給伊作園，收成五穀，造軍器及戰車的裝備。

¹³ 伊會召恁的查某子給伊製造芳油，煮食，烘餅。

¹⁴ 伊會給恁上好的田園、葡萄園、橄欖園提去互伊的人臣。

¹⁵ 恁的五穀及葡萄，伊會取十分一互伊的官員及人臣。

¹⁶ 伊會掠恁的奴僕、女婢、勇壯的少年人，及恁的驢仔，給伊做工。

¹⁷ 恁的羊群，伊欲取十分一；恁嘛會做伊的奴隸。

¹⁸ 彼時，恁會因為所揀的王哀叫，毋拘上主毋插恁。」

¹⁹ 毋拘人民毋聽撒母耳的話，反轉應講：「你講的，阮無贊成！阮一定欲有一個王治理阮。

²⁰ 按呢阮才會親像別國有家己的王給阮治理，導阮去交戰。」

²¹ 撒母耳聽著人民的話了後，就講互上主聽。

²² 上主對撒母耳講：「你著聽𪜶的要求，給𪜶設立一個王。」撒母耳就給以色列人講：「恁通倒去。」