撒母耳記上卷 6 - 現代台語譯本漢字版

約櫃運倒去以色列

¹ 上主的約櫃停留佇非利士人的地七月日久。

² 非利士人叫許個祭司及卜卦的來問：「上主的約櫃阮著按怎處理？請指點阮欲按怎送伊倒去原來的所在？」

³ 𪜶講：「恁若欲送以色列上帝的約櫃倒去，毋通互伊空手去，一定著帶賠罪的禮物；恁的病才會得著醫好，恁才會知是按怎上帝繼續啲刑罰恁。」

⁴ 非利士人問：「阮著用什麼做賠罪的禮物？」 祭司及卜卦的應講：「照非利士首領的數目，恁著造五粒金毒瘡，五隻金鳥鼠，因為恁的首領攏受著像款的災禍。

⁵ 恁著造毒瘡的模型，及毀壞恁的土地的鳥鼠的模型；閣著將榮光歸互以色列的上帝；無定著伊對恁、恁的神明、恁的土地會手下留情。

⁶ 恁是按怎欲親像埃及人及埃及王赫呢硬心？上帝豈毋是嚴嚴對付𪜶，𪜶才放以色列人離開？

⁷ 現在，恁著準備一台新的車，兩隻猶啲飼奶，毋曾掛軛的牛母，將牛母套佇車，給牛仔子牽倒去牛椆；

⁸ 閣將上主的約櫃下佇車頂，給你所造賠罪的金器囥佇約櫃邊的箱仔內送去。

⁹ 恁著注意看，彼台車若對交界的路上到伯‧示麥，就知降此個大災禍互咱的實在是上主。車若毋是向彼個方向去，就知拍咱的毋是伊，是咱偶然抵著的。」

¹⁰ 非利士人就照按呢做。𪜶將兩隻猶啲飼奶的牛母套佇彼台車，給牛仔子關佇牛椆；

¹¹ 閣給上主的約櫃，以及囥金鳥鼠、金毒瘡的模型的箱仔，攏下佇車頂。

¹² 牛母向伯‧示麥的大路直直行落去，那行那哮，無偏左右。非利士人的首領隨佇後面，一直到伯‧示麥的邊界。

¹³ 彼時伯‧示麥人佇山谷啲收割麥仔；𪜶攑頭一下看，看著約櫃就非常歡喜。

¹⁴ 車到伯‧示麥人約書亞的園，就停啲；佇遐有一塊大石，𪜶破彼台車的柴，給彼兩隻牛母做燒化祭獻互上主。

¹⁵ 利未人將上主的約櫃，及邊仔貯金器的箱仔提落來，下佇彼塊大石的頂面。伯‧示麥人佇彼日獻燒化祭及別款的祭互上主。

¹⁶ 非利士人五個首領攏有看著，就佇像彼日倒去以革倫。

¹⁷ 非利士人帶五個金毒瘡做賠罪祭還互上主；一個為著亞實突城，一個為著迦薩城，一個為著亞實基倫城，一個為著迦特城，一個為著以革倫城。

¹⁸ 金鳥鼠的數目照非利士五個首領所管設防的城及無設防的庄社來定。𪜶下上主的約櫃彼塊大石，到今仔日猶佇伯‧示麥人約書亞的園裡做證據。

約櫃佇基列‧耶琳

¹⁹ 上主拍死七十個伯‧示麥人，因為𪜶偷看約櫃的內面。人民大哀哭，因為上主拍死赫多人。

²⁰ 伯‧示麥人講：「啥人會當服事上主此位至聖的上帝？咱欲給約櫃送去叨位？」

²¹ 𪜶就差人去見基列‧耶琳人，講：「非利士人有將上主的約櫃送倒來；請恁來，給伊接去恁遐。」