撒母耳記上卷 5 - 現代台語譯本漢字版

約櫃佇非利士引起的災害

¹ 非利士人給上帝的約櫃搶去，對以便‧以謝運去亞實突。

² 非利士人給上帝的約櫃運去大袞的廟，給伊囥佇大袞的邊仔。

³ 隔日透早亞實突人起來，看著大袞倒佇上主的約櫃頭前，面仆佇土腳；就將大袞閣𫞼起來伊的原位。

⁴ 閣隔日透早，𪜶起來，看著大袞閣再倒佇上主約櫃頭前，面仆佇土腳，頭及兩支手掌攏斷去，落佇戶橂頂面；只有賰大袞的身軀。

⁵ 因為按呢，大袞的祭司及所有入亞實突 大袞廟的人，到今仔日攏無踏大袞廟的戶橂。

⁶ 上主的手重重拍亞實突人及周圍的人民，互𪜶生毒瘡，閣互𪜶驚。

⁷ 亞實突人看著按呢就講：「以色列上帝的約櫃毋通閣囥佇咱遮，因為伊的手重重拍咱，嘛拍咱的神明大袞。」

⁸ 亞實突人就派人請非利士的首領來，問𪜶，講：「阮著按怎處理以色列上帝的約櫃？」 𪜶應講：「給以色列上帝的約櫃運去迦特。」𪜶就將以色列上帝的約櫃運去。

⁹ 約櫃一下運到遐，引起大恐惶，因為上主的手攻擊彼個城；閣拍城內的人，互城內的人無論大細攏生毒瘡。

¹⁰ 𪜶就將上帝的約櫃送去以革倫。上帝的約櫃一下到以革倫，以革倫人喝講：「𪜶將以色列上帝的約櫃運來咱遮，是欲害死咱及咱的同胞。」

¹¹ 𪜶就派人去請非利士攏總的首領來，對𪜶講：「給以色列上帝的約櫃送倒去原來的所在，才免伊害死咱及咱的同胞。」 全城充滿死亡的驚惶；因為上帝的手重重拍𪜶。

¹² 無死的人攏生毒瘡；全城啼哭的聲透到天頂。