撒母耳記上卷 4 - 現代台語譯本漢字版

約櫃互人搶去

¹ 撒母耳的話傳遍以色列。 以色列人出去欲及非利士人交戰；𪜶佇以便‧以謝附近紮營，非利士人佇亞弗紮營。

² 非利士人排陣攻擊以色列人，𪜶刣贏，刣死以色列人大約四千人。

³ 以色列軍隊倒來營內，𪜶的長老講：「是按怎上主今仔日互咱刣輸非利士人？咱來去示羅扛上主的約櫃來咱遮，按呢伊佇咱中間，會救咱脫離對敵的手。」

⁴ 𪜶就派人去示羅，將上主 — 萬軍的統帥的約櫃扛來，因為上主坐佇約櫃頂面兩個天使基路伯的中間。以利兩個子何弗尼、非尼哈，及上帝的約櫃做夥來。

⁵ 上主的約櫃來到營中的時，以色列人大聲喝，地煞振動。

⁶ 非利士人聽著喊喝的聲，就講：「希伯來營中赫呢大聲，是啲喝什麼？」後來才知是上主的約櫃到營中。

⁷ 非利士人驚惶，講：「有神明來到𪜶的營中。」𪜶講：「慘啊，咱前到今毋曾抵著此款代誌。

⁸ 咱慘啊，啥人會當救咱脫離此款大權能的神明？以前佇曠野用逐款災禍拍死埃及人的，就是諸個神明。

⁹ 非利士人啊，著勇敢，著做大丈夫，恁才免做希伯來人的奴隸，親像𪜶以前做咱的奴隸。著做大丈夫及𪜶交戰。」

¹⁰ 非利士人就出戰，以色列人戰敗；步兵死三萬人，其他的攏逃走轉去𪜶兜。

¹¹ 上帝的約櫃互非利士人搶去；以利兩個子何弗尼及非尼哈嘛攏死。

以利死

¹² 仝彼日，有一個便雅憫支族的人對戰場走來示羅，衫拆裂，頭殼糝土粉表示哀傷。

¹³ 伊到的時，抵好以利佇路邊坐佇伊的椅仔啲看，因為伊啲掛慮上帝的約櫃。彼個人入城報消息，全城的人攏喉叫。

¹⁴ 以利聽著喉叫的聲，就問：「𪜶啲喝什麼？」彼個人趕緊來給以利報告。

¹⁵ 彼時以利已經九十八歲，目睭柴柴，無看見。

¹⁶ 彼個人給以利講：「我抵仔對戰場來，對戰場逃走來。」 以利講：「我的子，代誌按怎？」

¹⁷ 報消息的應講：「以色列人戰敗逃走，互人刣死的真多。你兩個子，何弗尼及非尼哈嘛死。上帝的約櫃互人搶去。」

¹⁸ 彼個人一下講著上帝的約櫃，以利就對椅仔倒摔向，倒落去門邊，頷頸折，就死；因為伊年老閣大箍。以利做以色列的士師四十年。

非尼哈的某死

¹⁹ 以利的新婦，非尼哈的某，懷孕啲欲生。伊聽著上帝的約櫃互人搶去，大官及丈夫攏死的消息，忽然催陣痛疼，屈落去生子。

²⁰ 伊啲欲死的時，佇邊仔啲照顧的婦仁人給伊講：「免驚，你生查甫的！」毋拘伊恬恬，無回應。

²¹ 伊給囝仔號名叫「以迦博」，意思是上帝的榮耀已經離開以色列；因為上帝的約櫃互人搶去，大官及丈夫嘛攏死。

²² 伊閣講：「榮耀已經離開以色列，因為上帝的約櫃互人搶去。」