撒母耳記上卷 31 - 現代台語譯本漢字版

掃羅及伊的子戰死

¹ 非利士人攻擊以色列人；以色列人戰敗逃走，佇基利波山死真多人。

² 非利士人追趇掃羅及伊許個子，刣死掃羅三個子約拿單、亞比拿達，及麥基‧舒亞。

³ 掃羅受著猛烈的攻擊；伊互射箭的人發見，射著，受傷真傷重。

⁴ 掃羅給替伊攑軍器的侍衛講：「拔刀給我鑿死，才免我互諸個無受割禮的人刣死，給我凌辱。」彼個侍衛毋敢，因為伊真驚。掃羅就向刀仆落去，家己鑿死。

⁵ 彼個侍衛看著掃羅已經死，嘛仆落去，家己鑿，及掃羅做夥死。

⁶ 掃羅及伊三個子，攑軍器的，及所有跟隨掃羅的人仝一日死。

⁷ 佇耶斯列山谷彼旁及佇約旦河東旁的以色列人，看著𪜶的軍隊已經逃走，掃羅及伊的子嘛攏戰死，就放城逃走。非利士人就來佔許個城，佇遐徛起。

⁸ 隔日，非利士人來剝戰死的人的物件，看著掃羅及伊三個子死佇基利波山，

⁹ 就斬伊的頭，褪伊的戰甲，派人去非利士逐所在，將此個消息報互𪜶廟裡的偶像及人民知。

¹⁰ 𪜶將掃羅的戰甲下佇亞斯她錄的廟內，將伊的身屍釘佇伯‧善的城牆頂。

¹¹ 基列的雅比的住民聽著非利士人對掃羅所做的代誌，

¹² 𪜶的勇士攏起來，歸暝行軍，去將掃羅及伊的子的身屍對伯‧善的城牆取落來，帶到雅比，佇遐火化，

¹³ 將𪜶的骨骸葬佇雅比的柳樹腳，禁食七日。