撒母耳記上卷 30 - 現代台語譯本漢字版

及亞瑪力人交戰

¹ 第三日，大闢及伊的部下倒去洗革拉。𪜶到以前，亞瑪力人已經有侵犯猶大南方及洗革拉。亞瑪力人放火燒洗革拉，

² 掠婦女及城內的人，無論大細，一個都無刣死，攏給𪜶掠去。

³ 大闢及伊的部下到彼個城，看著城已經燒去，𪜶的某、子、查某子，攏互人掠去。

⁴ 大闢及隨伊的人就開聲哮，哮甲無力通閣哮。

⁵ 大闢兩個某，就是耶斯列人亞希暖及拿霸的遺孀迦密人愛比該，嘛互亞瑪力人掠去。

⁶ 大闢非常著急，因為伊的部下為著𪜶的子、查某子苦痛慼心，講欲用石頭給伊抌死。毋拘大闢倚靠上主 — 伊的上帝得著氣力。

⁷ 大闢給亞希米勒的子祭司亞比亞他講：「請你帶以弗得來。」亞比亞他就帶以弗得來互大闢。

⁸ 大闢問上主講：「我追趇許個匪徒，豈趇會著？」 上主應講：「去趇，一定會趇著，嘛一定會當救𪜶倒來。」

^9-10 大闢就導伊的部下六百人出發，來到比梭溪。有兩百個厭倦，行𣍐過比梭溪，就留佇遐。大闢及四百個部下繼續去追趇。

¹¹ 𪜶佇野外抵著一個埃及人，就帶伊去大闢遐；用餅互伊食，用水互伊飲；

¹² 閣互伊一粒無花果乾丸，兩粒葡萄乾丸；伊食了，元氣回復；因為伊三暝三日無食無飲。

¹³ 大闢問伊講：「你的主人是啥人？你對叨位來？」 伊應講：「我是埃及囝仔，是亞瑪力人的奴隸。我三日前破病，就互主人放拺。

¹⁴ 阮侵犯猶大南部的基利提及迦勒地區，閣用火燒洗革拉。」

¹⁵ 大闢問伊講：「你豈肯導我去許個匪徒遐？」 伊應講：「你著指上帝對我咒誓，保證𣍐給我刣死，嘛𣍐將我交互我的主人，我就導你去。」

¹⁶ 伊導大闢落去的時，看著𪜶分散一四界啲飲食跳舞；因為𪜶對非利士地及猶大地搶的物真多。

¹⁷ 大闢對天未光攻擊𪜶到黃昏暗；只有四百個騎駱駝的少年人走有去，以外無一個走有離。

¹⁸ 亞瑪力人劫去的財物，大闢攏有搶轉來，嘛有給伊兩個某救倒來。

¹⁹ 亞瑪力人搶去的，無論大細、子、查某子、財物，大闢攏帶轉來，無失落一項。

²⁰ 大闢的部下將所有搶來的牛群羊群，趕佇其他牲生的頭前，展講：「諸個是大闢的戰利品。」

²¹ 大闢轉來到許個因為厭倦無隨伊去，留佇比梭溪的兩百人遐。𪜶出來迎接大闢及有隨伊去的軍兵的時，大闢行進前給𪜶請安。

²² 及大闢去的人中間有一寡歹人匪類按呢講：「𪜶無及咱去，諸個戰利品分互𪜶，干焦𪜶的某、子兒，互𪜶導轉去。」

²³ 大闢講：「兄弟啊，上主賞賜互咱的物，毋通按呢處理，因為伊有保護咱，將攻擊咱的對敵交佇咱的手。

²⁴ 恁此款做法啥人會同意？出陣的人分著偌多，顧補給品的人嘛著分赫多；大家著公家分。」

²⁵ 對彼日起，大闢設立此個辦法做以色列的規例及命令，直到今仔日。

²⁶ 大闢到洗革拉的時，提一部份的戰利品送互伊的朋友，猶大的長老。伊講：「諸個是對上主的對敵搶來的，送互恁做禮物。」

²⁷ 伊將禮物送互𫢶佇伯特利，猶大南方的拉末、雅提珥、

²⁸ 亞羅珥、息末、以實提莫、

²⁹ 拉哈勒、耶拉篾人及基尼人許個城，

³⁰ 何珥瑪、坡拉珊、亞撻、

³¹ 希伯崙，以及大闢及伊的部下平常有啲往來的所在的長老。