撒母耳記上卷 3 - 現代台語譯本漢字版

上主對撒母耳顯現

¹ 囝仔撒母耳受以利教導服事上主。當時真罕得有對上主來的信息，無常常有啟示。

² 有一暝，以利佇家己的房間啲睏；伊的目睭已經霧，看𣍐明。

³ 撒母耳佇囥上帝約櫃的殿內嘛啲睏；天猶未光，上帝的燈猶啲𤏸。

⁴ 上主叫撒母耳；撒母耳應講：「我佇遮。」

⁵ 伊就走去以利遐，講：「我佇遮，你叫我乎？」 以利講：「我無叫你，倒去睏。」伊就去睏。

⁶ 上主閣叫撒母耳；撒母耳起來，去以利遐，講：「我佇遮，你叫我乎？」 伊應講：「我的子，我無叫你，倒去睏。」

⁷ 彼陣撒母耳毋識上主；上主的話猶未對伊啟示。

⁸ 上主第三遍叫撒母耳。撒母耳起來，去以利遐，講：「我佇遮，你叫我乎？」 以利才知是上主啲叫囝仔。

⁹ 以利就給撒母耳講：「你閣去睏。伊若閣叫你，你就講：『上主啊，請你講，你的奴僕啲聽。』」撒母耳就閣倒去睏。

¹⁰ 上主閣來徛啲，親像前幾若遍按呢叫：「撒母耳，撒母耳。」 撒母耳應講：「請講，你的奴僕啲聽。」

¹¹ 上主給撒母耳講：「注意聽，我欲佇以色列人中間做一項代誌，互聽著的人攏驚一趒。

¹² 佇彼日，關係以利的家我所講的代誌攏會實現。

¹³ 我有給伊講，我欲永遠審判𪜶此家；伊知伊的子有犯應該受咒詛的罪，閣無給𪜶譴責。

¹⁴ 所以我對以利的家咒誓：『以利𪜶此家的罪用牲禮祭物嘛𣍐當得著赦免。』」

¹⁵ 撒母耳睏到天光，開上主的殿門。撒母耳毋敢將異象給以利講。

¹⁶ 以利叫撒母耳，講：「我的子撒母耳。」 伊應講：「我佇遮。」

¹⁷ 以利講：「上主對你講什麼？你毋通給我隱瞞；你若將伊給你講的對我掩蓋一句，願上帝加倍給你責罰。」

¹⁸ 撒母耳就將許個話攏給以利講，無對伊隱瞞。以利講：「伊是上主。上主會照伊看做好的去做。」

¹⁹ 撒母耳漸漸大漢；上主及伊同在，互伊所講的話逐句攏實現。

²⁰ 對但到別是巴，所有的以色列人攏知撒母耳確實是上主的先知。

²¹ 上主繼續佇示羅顯現。上主佇示羅用伊的話啟示撒母耳。