撒母耳記上卷 29 - 現代台語譯本漢字版

非利士人無信任大闢

¹ 非利士人召集𪜶所有的軍隊到亞弗。以色列人佇耶斯列的水泉邊紮營。

² 非利士人的首領帶兵出陣，有的帶百人，有的帶千人。大闢及伊的部下，以及亞吉王行佇後面。

³ 非利士人的將領講：「諸個希伯來人佇遮創啥？」 亞吉王給非利士人的將領講：「此個人是以色列王掃羅的將領大闢。伊已經及我住年外；對伊來投降到今仔日，我毋曾看著伊有犯什麼過失。」

⁴ 非利士人的將領對亞吉受氣，給伊講：「互此個人倒去你給伊安置的所在，毋通互伊及咱出去交戰，才免伊佇交戰的時變做咱的對敵。伊欲用什麼回復伊的主人對伊的信任？豈毋是咱諸個人的頭殼？

⁵ 以前以色列人跳舞的時，有人唱，有人應，講： 掃羅刣死千千， 大闢刣死萬萬； 𪜶所講的豈毋是此個大闢？」

⁶ 亞吉叫大闢來，給伊講：「我指永活的上主咒誓，你是誠實的人；你佇我的軍隊服役，我真滿意，因為對你來遮到今仔日，我毋曾看著你有什麼失錯。毋拘其他的首領無合意你。

⁷ 今你平安轉去，才免諸個首領無歡喜你的所做。」

⁸ 大闢對亞吉講：「我有做什麼代誌？對我來你遮到今仔日，你佇你奴僕的身上有看著什麼代誌，互你的奴僕𣍐當及王 — 我的主的對敵交戰？」

⁹ 亞吉應講：「我知，我看你親像上帝的使者赫呢好，毋拘非利士人的將領無愛你及阮鬥陣去交戰。

¹⁰ 所以，明仔載天一下光，你著導所有離開掃羅，隨你來我遮的人離開。」

¹¹ 隔早起，大闢及隨伊的人透早就出發，倒去非利士人的地；像時，非利士人向耶斯列進軍。