撒母耳記上卷 28 - 現代台語譯本漢字版

¹ 過無偌久，非利士人召集軍隊欲攻擊以色列人。亞吉王對大闢講：「你應該知，你及你的部下著及我鬥陣作戰。」

² 大闢應講：「無問題，我是你的奴僕，你知我會為著你做什麼。」 亞吉王給大闢講：「按呢，我欲派你做我終身的侍衛。」

掃羅求問尪姨

³ 彼時撒母耳已經死，所有的以色列人為著伊哀哭，給伊埋葬佇伊的故鄉拉瑪。掃羅曾將尪姨及行邪術的攏趕出國境。

⁴ 非利士人聚集，行軍到書念紮營；掃羅聚集所有的以色列人佇基利波紮營。

⁵ 掃羅看著非利士的軍兵，就真驚，心肝噗噗筅。

⁶ 掃羅問上主；上主攏無用眠夢，無用烏陵，抑是先知，給伊應答。

⁷ 掃羅吩咐伊的僕人講：「給我尋一個尪姨，我通去問伊。」 僕人講：「佇隱‧多珥有一個尪姨。」

⁸ 掃羅就變裝，穿別款衫；導兩個人及伊做夥去。佇暝時𪜶去彼個尪姨遐。 掃羅給伊講：「請你用牽亡的法術，牽我給你講彼個人出來。」

⁹ 尪姨對伊講：「你知掃羅的所做；伊有給尪姨及行邪術的攏趕出國境；你是按怎設計欲害我的性命？」

¹⁰ 掃羅指上主對伊咒誓，講：「我指永活的上主咒誓，你𣍐因為此個代誌受刑罰。」

¹¹ 尪姨講：「你愛我給你牽啥人出來？」 伊講：「給我請撒母耳出來。」

¹² 尪姨看著撒母耳就大聲吱出來，給掃羅講：「你是按怎騙我？你是掃羅！」

¹³ 王對伊講：「免驚，你看見什麼？」 尪姨給掃羅講：「我看著神魂對地裡出來。」

¹⁴ 掃羅講：「伊生做啥款？」 尪姨講：「有一個老人出來，身軀幔長衫。」 掃羅知是撒母耳，就仆佇土腳給伊拜。

¹⁵ 撒母耳給掃羅講：「你是按怎攪擾我，牽我出來？」 掃羅講：「我非常痛苦，因為非利士人來攻擊我，上帝嘛離開我，無閣通過先知抑是眠夢應答我。所以我請你來，通指示我著按怎做。」

¹⁶ 撒母耳講：「上主已經離開你，做你的對敵；你哪著問我？

¹⁷ 上主會照伊交代我對你講的實現；伊已經將你的王權剝起來交互你的同伴大闢。

¹⁸ 因為你違背上主的話，無將亞瑪力人及𪜶所有的攏消滅，所以上主今仔日對你做此個代誌。

¹⁹ 上主欲將你及以色列交佇非利士人的手。明仔載你及你的子兒會及我做夥；上主嘛欲將以色列的軍隊交佇非利士人的手。」

²⁰ 掃羅因為撒母耳的話非常驚惶，隨時倒落去，倒甲直直直；歸暝歸日無食半項，身軀攏無力。

²¹ 彼個尪姨行倚去掃羅遐，看著伊赫呢驚惶，就對伊講：「你的女婢聽你的話，無顧家己的性命，有照你的要求去做。

²² 今，請你聽女婢的話，允准我款淡薄物件互你食，你才有氣力上路。」

²³ 掃羅拒絕，講：「我毋食。」毋拘伊的僕人及尪姨給伊好嘴苦勸，伊才聽𪜶的話，對土腳起來，坐佇眠床。

²⁴ 尪姨趕緊牽厝裡彼隻肥牛仔去刣，閣抄麵粉，烘無酵餅，

²⁵ 排佇掃羅及伊的僕人面前，𪜶就食。彼暝𪜶起身倒去。