撒母耳記上卷 27 - 現代台語譯本漢字版

大闢投靠非利士人

¹ 大闢心內想：「總有一日我會死佇掃羅的手，寧可走來非利士人的地，按呢掃羅就會死心，𣍐閣佇以色列境內尋我，我就會當脫離伊的手。」

² 大闢就導六百個部下，過去迦特王，瑪俄的子亞吉遐。

³ 大闢及伊兩個某，就是耶斯列人亞希暖及拿霸的遺孀迦密人愛比該，及大闢的部下以及𪜶的家眷，攏𫢶佇迦特王亞吉遐。

⁴ 有人給掃羅講大闢已經走去迦特，掃羅就無閣追趇伊。

⁵ 有一日，大闢對亞吉王講：「你若看我做朋友，請佇庄腳賜我一個所在通住，你的奴僕就免及你住佇京城。」

⁶ 彼日，亞吉王將洗革拉互伊；因為按呢，洗革拉屬猶大王，直到今仔日。

⁷ 大闢𫢶佇非利士人的地，共一年四個月。

⁸ 大闢及伊的部下上去攻打基述人、基色人、亞瑪力人；此幾族已經佇書珥到埃及彼中間的地區住真久。

⁹ 大闢無論攻佔什麼所在，男女攏刣死，無留甲半個；閣搶𪜶的牛、羊、驢、駱駝，及衣服，倒轉來見亞吉。

¹⁰ 亞吉王逐遍攏會問伊：「恁今仔日去攻佔什麼所在？」大闢會應講「阮去攻佔猶大南方」，抑是講「耶拉篾人的南方」，抑是講「基尼人的南方」。

¹¹ 大闢逐遍將男女攏刣死，連一個都無帶轉去迦特，才免𪜶將大闢所做的代誌報人知。大闢𫢶佇非利士人的地的時攏按呢做。

¹² 亞吉信任大闢，想講：「大闢互伊的本族以色列人厭惡，所以伊會永遠做我的奴僕。」