撒母耳記上卷 26 - 現代台語譯本漢字版

大闢閣一遍無刣掃羅

¹ 西弗人閣去基比亞給掃羅報告，講大闢匿佇約斯門東旁的哈基拉山。

² 掃羅就起來，導以色列中特選的兵三千，落去西弗的曠野欲尋大闢。

³ 掃羅佇約斯門東旁的哈基拉山路邊紮營。大闢𫢶佇曠野，聽著掃羅來曠野欲追趇伊，

⁴ 就差幾若個偵探去探，才知掃羅真正來啦。

⁵ 大闢就出發，去掃羅紮營的所在，看著掃羅及尼珥的子元帥押尼珥睏的所在，掃羅睏佇軍營的中央，部隊佇伊的周圍紮營。

⁶ 大闢對赫人亞希米勒及洗璐雅的子，約押的兄弟亞比篩，講：「啥人欲及我落去掃羅的營內？」 亞比篩講：「我及你落去。」

⁷ 大闢及亞比篩透暝到部隊遐，看著掃羅佇軍營的中央啲睏；伊的槍佇頭殼邊，插佇土腳；押尼珥及軍兵睏佇伊的周圍。

⁸ 亞比篩對大闢講：「今仔日上帝將你的對敵交佇你的手。請准我用槍給伊鑿迵過，釘佇土腳；一下就好，免鑿兩下。」

⁹ 大闢給亞比篩講：「毋通給伊刣死！啥人傷害上主所選立的王閣會當無罪？」

¹⁰ 大闢閣講：「我指永活的上主咒誓，上主會給伊拍死，若毋是死期到死去，就是佇戰場戰死。

¹¹ 我絕對毋敢下手拍上主選立的王；干焦提伊頭殼邊的槍及水瓶，咱就走。」

¹² 大闢就去提掃羅頭殼邊的槍及水瓶。兩人離開，無人看著，無人知，嘛無人醒；𪜶攏啲睏，因為上主互𪜶睏重眠。

¹³ 後來，大闢過去另外彼旁，徛佇山頂，及𪜶相離不止遠。

¹⁴ 大闢對軍隊及尼珥的子押尼珥喝講：「押尼珥啊，你有聽著無，你哪毋應？」 押尼珥講：「你是啥人，敢給王吵醒？」

¹⁵ 大闢對押尼珥講：「你豈毋是以色列中上強的勇士？是按怎你無保護你的主你的王？抵即有一個兵仔入去欲害你的王你的主。

¹⁶ 你無盡責任。我指永活的上主咒誓，恁攏該死，因為無保護恁的主，就是上主所選立的王。你看覓咧，王頭殼邊的槍及水瓶佇叨位？」

¹⁷ 掃羅認出是大闢的聲，就講：「我的子大闢，是你噢？」 大闢講：「王，我的主啊，是我！」

¹⁸ 伊閣講：「我的主是按怎啲追趇你的奴僕？我有做什麼？我有做什麼歹？

¹⁹ 王，我的主啊，求你聽奴僕的話。若是上主激動你攻擊我，願伊歡喜接受我獻的祭。若是人給你使弄，願𪜶受上主咒詛，因為𪜶今仔日給我趕出上主應允的土地，害我著去服事別個神明。

²⁰ 求你毋通互我死佇外國，離開上主面前。以色列王哪著出來尋一隻虼蚤，哪著佇山裡親像啲趇一隻野鳥！」

²¹ 掃羅應講：「我毋著。我的子大闢，你通倒來。我𣍐閣害你，因為今仔日你有看重我的性命。我實在真糊塗，犯即呢大的錯誤！」

²² 大闢講：「王啊，你的槍佇遮，請叫一個部下過來攑轉去。

²³ 上主會照逐個人的正義信實給伊報答；今仔日上主有將你交佇我的手，毋拘我無出手傷害上主選立的王。

²⁴ 我今仔日看重你的性命，願上主嘛按呢看重我的性命，救我脫離所有的患難。」

²⁵ 掃羅給大闢講：「我的子大闢，願你得著上帝的祝福；你會做大代誌，所做的一定會成功。」 大闢就離開，掃羅嘛倒轉去伊住的所在。