撒母耳記上卷 23 - 現代台語譯本漢字版

大闢救基伊拉城

¹ 有人給大闢講：「非利士人啲攻擊基伊拉城，搶五穀場。」

² 大闢問上主：「我來去攻擊許個非利士人好無？」 上主給大闢講：「你去拍非利士人，解救基伊拉。」

³ 跟隨大闢的人給伊講：「咱佇猶大地都真驚非利士人，何況去基伊拉拍𪜶的軍隊？」

⁴ 大闢閣問上主；上主應講：「你去，落去基伊拉，因為我欲將非利士人交佇你的手。」

⁵ 大闢及跟隨伊的人去基伊拉，及非利士人交戰；搶𪜶的牲生，刣死𪜶真多人。按呢，大闢有解救基伊拉的住民。

⁶ 亞希米勒的子亞比亞他逃走去基伊拉見大闢的時，手裡有帶以弗得去。

⁷ 有人給掃羅講：「大闢來到基伊拉。」 掃羅講：「上帝已經將伊交佇我的手，因為伊入去有門有閂的城，家己關佇彼內面。」

⁸ 掃羅就召集所有的軍兵欲去攻打基伊拉，包圍大闢及跟隨伊的人。

⁹ 大闢知掃羅設計謀欲害伊，就給祭司亞比亞他講：「你帶以弗得來。」

¹⁰ 大闢講：「上主 — 以色列的上帝啊，你的僕人有聽著掃羅欲來基伊拉，為著我的緣故剿滅此個城。

¹¹ 基伊拉人會將我交佇伊的手𣍐？掃羅會照你的僕人所聽著的落來抑𣍐？上主 — 以色列的上帝啊，求你指示你的僕人。」 上主講：「掃羅會落來。」

¹² 大闢閣講：「基伊拉人會將我及隨我的人交佇掃羅的手抑𣍐？」 上主講：「𪜶會將你交互伊。」

¹³ 大闢及跟隨伊的人約有六百，隨時離開基伊拉，四界飄流。 有人給掃羅講：「大闢已經對基伊拉逃走。」掃羅就無出兵。

大闢佇曠野閃避掃羅

¹⁴ 大闢匿佇西弗曠野山區的要塞。掃羅逐日追尋大闢，毋拘上帝無將大闢交佇伊的手。

¹⁵ 大闢知掃羅已經出來欲刣伊，彼時大闢𫢶佇西弗曠野的哈列。

¹⁶ 掃羅的子約拿單出發去哈列見大闢，鼓勵伊著信靠上帝的保護，

¹⁷ 給伊講：「毋免驚，阮老父掃羅的手無法度傷害你。你會做以色列王，我甘願坐第二位。此個事我的老父掃羅已經知。」

¹⁸ 𪜶兩人就佇上主的面前立約結盟。大闢留佇哈列，約拿單倒去伊的厝。

¹⁹ 有一寡西弗人上去基比亞見掃羅，講：「大闢豈毋是匿佇阮境內，約斯門南旁哈基拉山，哈列的要塞？

²⁰ 王啊，你若想欲落去，請此陣來去；阮會掠伊來交佇王的手。」

²¹ 掃羅講：「願上主賜福恁，因為恁對我真好。

²² 恁倒去，詳細調查，確實知伊𫢶佇叨位，什麼人有看著伊，因為有人給我講，伊真詭詰。

²³ 恁去，查出伊確實匿的所在；若知影，著來給我報告，我就欲及恁去。伊若佇猶大境內，我欲對所有的宗族中給伊抄出來。」

²⁴ 許個人就出發，比掃羅較代先去西弗。大闢及跟隨伊的人匿佇瑪雲的曠野，約斯門南旁的亞拉巴。

²⁵ 掃羅導伊的部下去追尋大闢；有人給大闢講，伊就落去瑪雲曠野的山巖遐。掃羅聽著，就佇瑪雲的曠野追趇大闢。

²⁶ 掃羅及伊的部下佇山的此旁，大闢及跟隨伊的人佇山的彼旁。掃羅及伊的部下逼倚大闢，啲欲掠著。大闢趕緊走，閃避掃羅。

²⁷ 彼時，有使者來報掃羅講：「你著趕緊倒來，因為非利士人侵犯咱的國境。」

²⁸ 掃羅就倒去對抗非利士人，無閣追趇大闢；因為按呢，彼個所在叫做西拉‧哈瑪希羅結，意思是隔離的山巖。

²⁹ 大闢離開遐，就去𫢶佇隱‧基底的要塞。