撒母耳記上卷 22 - 現代台語譯本漢字版

掃羅殺害祭司

¹ 大闢離開迦特，走到亞杜蘭洞；伊的兄弟及伊的老父全家聽著，就攏落去伊遐。

² 所有受壓迫的，欠債的，心不滿的，攏聚集來伊遐，大闢就做𪜶的頭；去倚伊的，約有四百人。

³ 大闢對遐去摩押的米斯巴，對摩押王講：「求你允准我的父母來𫢶恁遮，聽候我知上帝按怎給我安排。」

⁴ 大闢導𪜶到摩押王遐。大闢住佇要塞彼段時間，伊的父母攏住佇摩押王遐。

⁵ 後來，先知迦得給大闢講：「毋通閣住佇要塞，著去猶大地區。」大闢就離開，去哈列的樹林。

⁶ 有一日，掃羅佇基比亞的拉瑪，坐佇柳樹腳，手裡攑槍，眾侍衛徛佇伊周圍。彼時，掃羅聽著有人知影大闢及隨伊的人佇叨位，

⁷ 就給伊的侍衛講：「便雅憫人啊，聽咧。恁想講耶西的子會互恁逐個人田及葡萄園噢？會派恁做官長指揮一千個，抑是一百個兵噢？

⁸ 恁竟然共謀欲背叛我。我家己的子及耶西的子結盟，恁無人給我報告；恁中間無人關心我。今仔日我的子使弄我的部下當等欲害我，恁攏無報我知。」

⁹ 彼時以東人多益徛佇掃羅侍衛的中間，給伊講：「我有看著耶西的子去挪伯，到亞希突的子亞希米勒遐。

¹⁰ 亞希米勒替大闢問上主，閣互伊食物，嘛攑非利士人歌利亞的刀互伊。」

¹¹ 王就派人召亞希突的子祭司亞希米勒，閣召𪜶老父全家，就是𫢶佇挪伯許個祭司來；𪜶就攏來王遐。

¹² 掃羅講：「亞希突的子，聽咧！」 伊應講：「我的主啊，我佇遮。」

¹³ 掃羅給伊講：「你是按怎及耶西的子共謀背叛我，互伊餅及刀，閣替伊求問上帝，致到伊今仔日當等欲害我？」

¹⁴ 亞希米勒應王講：「你的侍衛啥人會比大闢較盡忠？伊是王的子婿，閣是你的侍衛長，佇宮廷受敬重。

¹⁵ 我豈今仔日才替伊求問上帝？絕對毋是。請王毋通給罪歸互你的僕人及我的老父全家；因為背叛王諸個代誌，無論大細項，你的僕人攏毋知。」

¹⁶ 王講：「亞希米勒，你及你的老父全家攏著死。」

¹⁷ 王就命令左右的侍衛講：「恁去，給上主的祭司攏刣死；因為𪜶倚大闢，𪜶知大闢逃走閣無報我知。」毋拘王的侍衛毋肯下手刣上主的祭司。

¹⁸ 王給多益講：「你去，去刣許個祭司。」以東人多益就去刣祭司；彼日刣死八十五個穿幼麻布以弗得的人。

¹⁹ 伊閣用刀刣祭司的城挪伯城內的人，無論男女、囝仔、食奶的嬰仔，及牛、驢、羊，攏刣死。

²⁰ 亞希突的子亞希米勒有一個子叫做亞比亞他，逃走去大闢遐。

²¹ 亞比亞他將掃羅刣死上主的祭司的代誌給大闢講。

²² 大闢給亞比亞他講：「彼日我看著以東人多益佇遐，就知伊一定會給掃羅報告。你的老父全家失落性命，攏是因為我的緣故。

²³ 你來及我住，毋免驚，因為想欲害你性命的嘛欲害我；來及我住，你就安全。」