撒母耳記上卷 21 - 現代台語譯本漢字版

大闢逃避掃羅

¹ 大闢去挪伯見祭司亞希米勒。亞希米勒驚驚惶惶出來見大闢，對伊講：「你哪家己一個，無人及你鬥陣？」

² 大闢應講：「王互我一個任務，命令講此個任務毋通互人知。我已經派部下佇某一個所在聽候我。

³ 今你有什麼通食，請你互我五個餅，抑是別項食物。」

⁴ 祭司應講：「我手內無普通的餅，只有分別作聖的餅；你的部下無親近婦女才通食。」

⁵ 大闢講：「最近阮攏無親近婦女。阮出去執行任務的時，諸個軍兵攏有潔淨。連平常都按呢，何況此遍的任務特別，軍兵的身軀閣較有保持潔淨。」

⁶ 祭司就提分別作聖的餅互大闢，因為佇遐無別項餅，只有獻祭的餅，是獻新餅的時對上主面前換落來的。

⁷ 彼日，佇遐有一個掃羅的人臣留佇上主的面前；伊是以東人，叫做多益，是掃羅的牧者的總管。

⁸ 大闢問亞希米勒講：「你遮有槍抑是刀無？因為王的任務真緊急，我煞無帶刀抑是其他的武器。」

⁹ 祭司應：「遮有一支刀，是你以前佇以拉的山谷所刣死的非利士人歌利亞的，用布包啲，囥佇以弗得的後面。你欲用就攑去；此支以外無別支。」 大闢講：「此支刀互我，無別支比此支較好。」

¹⁰ 彼日大闢離開，走到迦特王亞吉遐，去閃避掃羅。

¹¹ 亞吉許個人臣對伊講：「此個豈毋是以色列國的王大闢？豈毋是眾婦女那跳舞那唱講 『掃羅刣死千千； 大闢刣死萬萬』 彼個大闢？」

¹² 大闢聽著諸個話心內不安，真驚迦特王亞吉，

¹³ 所以佇眾人面前假起𤞚，佇城門的門扇亂寫亂畫，嘴涎波噴甲歸嘴鬚。

¹⁴ 亞吉給伊的人臣講：「恁看，此個人啲起𤞚。恁哪給伊導來我遮？

¹⁵ 我遮豈有欠𤞚人？恁哪給導來？毋通互此個人入我的厝。」