撒母耳記上卷 20 - 現代台語譯本漢字版

約拿單幫贊大闢

¹ 大闢對拉瑪的拿約逃走，去見約拿單，講：「我有做什麼？有什麼毋著？有對恁老父犯著什麼罪，伊竟然欲追殺我？」

² 約拿單給伊講：「無此款代誌！你絕對𣍐死。我的老父做代誌，無論大細，攏會互我知。此項代誌伊哪著給我掩蓋？絕對𣍐！」

³ 大闢閣咒誓講：「你的老父明明知你真意愛我，所以心內想：『毋通互約拿單知，驚了伊傷心。』我指永活的上主及你的性命咒誓，死已經逼到眼前啦。」

⁴ 約拿單給大闢講：「你愛我做什麼，我一定會做。」

⁵ 大闢給約拿單講：「明仔載是初一，我應該著及王食飯。若會用得，請容允我去匿佇野外，到第三日暗時。

⁶ 你的老父若發見我無佇遐，你著講：『大闢有得著我的允准，轉去故鄉伯利恆，𪜶全家佇遐啲獻年祭。』

⁷ 伊若講『好』，你的僕人就平安無事；伊若受氣，你就知伊決定欲害我。

⁸ 今你著誠心對待你的僕人；請你守你及我佇上主面前所立的約。我若有罪，你著親身刣我；哪著等你的老父下手？」

⁹ 約拿單講：「我一定𣍐按呢做。我若確實知我的老父決定欲害你，我豈𣍐給你講？」

¹⁰ 大闢給約拿單講：「你的老父若歹聲嗽應你，什麼人欲報我知？」

¹¹ 約拿單給大闢講：「來，咱來去野外。」𪜶就做夥去。

¹² 約拿單給大闢講：「願上主 — 以色列的上帝作證：明仔載抑是後日此個時，我會探阮老父的意思；伊對你的反應若好，我一定會派人報你知。

¹³ 我的老父若存心欲害你，我一定會給你講，互你平安離開；若無，願上主加倍責罰我。願上主及你同在，親像以前及我的老父同在仝款。

¹⁴ 我若猶活啲，你一定著照上主的慈愛對待我。我若死，

¹⁵ 閣上主剿滅你的對敵的時，你嘛著仝款永遠照上主的慈愛對待我的家族。」

¹⁶ 約拿單就及大闢的家立約，閣講：「願上主用大闢對敵的手刑罰背約的人。」

¹⁷ 約拿單因為愛大闢，就要求大闢閣咒誓；因為伊疼大闢親像疼家己的性命。

¹⁸ 約拿單給伊講：「明仔載是初一，食飯的時，你無在場，人一定會注意著。

¹⁹ 所以，後日你著趕緊落去前抵著代誌匿的所在，佇以色的石磐遐聽候；

²⁰ 我會用石磐做目標射三支箭。

²¹ 我會差一個少年人去尋箭。我若給彼個少年人講『箭佇你的後面，著去拾』，你就通倒來。我指永活的上主咒誓，你平安無事。

²² 我若給少年人講『箭佇你的頭前』，你著趕緊走；因為是上主愛你離開。

²³ 咱兩個的約定，有上主佇你我中間永遠作證。」

²⁴ 大闢就去匿佇野外。初一彼日，王坐桌欲食。

²⁵ 王照常坐伊倚壁彼個位，佇約拿單的對面，押尼珥坐佇掃羅身邊；大闢的位空啲。

²⁶ 毋拘彼日掃羅無講什麼；伊想講大闢抵著代誌互伊無清氣，到現在猶未潔淨。

²⁷ 隔日，初二，大闢的位猶原空空。掃羅問約拿單：「耶西的子是按怎昨日今仔日攏無來食？」

²⁸ 約拿單應掃羅講：「大闢迫切求我允准伊倒去伯利恆。

²⁹ 伊講：『請你允准我倒去，因為阮兜佇城內有祭祀，我的兄哥吩咐我轉去；今你著施恩互我，准我去見我的兄哥。』因為按呢大闢無來及王坐桌。」

³⁰ 掃羅對約拿單發性地，給伊講：「你此個不貞背逆的查某人生的子，我都知你徛佇耶西的子彼旁，家己取凌辱，閣互你的老母受著褪裼的見笑。

³¹ 耶西的子若活啲，你及你的王權一定𣍐穩固。今著派人去給掠來我遮。伊一定著死！」

³² 約拿單應講：「伊是按怎著死？伊有做什麼毋著？」

³³ 掃羅攑槍射約拿單，欲給伊鑿死。約拿單就知伊的老父決心欲刣大闢。

³⁴ 約拿單真受氣，對坐位徛起來，初二彼日攏無食什麼。伊為著大闢心艱苦，因為伊的老父侮辱大闢。

³⁵ 隔早起，約拿單照約定，出去野外欲及大闢見面；有一個少年人隨伊去。

³⁶ 約拿單給少年人講：「你走去尋我射的箭。」彼個少年人一下走去，約拿單就射一支箭，飛過少年人。

³⁷ 彼個少年人走到約拿單箭落落去的所在，約拿單佇後面喝講：「箭佇你的頭前。」

³⁸ 約拿單閣喝：「趕緊，緊去，毋通延延。」彼個少年人就拾許個箭轉來伊的主人遐，

³⁹ 毋拘伊毋知這是什麼意思，只有約拿單及大闢知。

⁴⁰ 約拿單將弓及箭交互少年人，吩咐講：「你提倒去城內。」

⁴¹ 少年人離開了後，大闢對石頭堆後面出來，仆佇土腳給約拿單拜三遍；兩人相唚，攬啲哭，大闢哭甲真激動。

⁴² 約拿單給大闢講：「你通平安去；咱兩人已經有指上主的名咒誓講：『願上主幫贊咱永遠堅守你及我、你的後代及我的後代中間所立的約。』」大闢就離開，約拿單嘛倒去城內。