撒母耳記上卷 2 - 現代台語譯本漢字版

哈娜的祈禱

¹ 哈娜祈禱講： 我的心因為上主歡喜； 我的頭因為上主攑高高； 我的嘴敢向對敵誇耀， 因為你的拯救互我快樂。

² 只有上主至聖， 你以外無別個； 咱的上帝是唯一的保護者。

³ 人毋通自高講驕傲的話； 毋通自誇講大話， 因為上主是無所不知的上帝， 人的行為受你評鑑。

⁴ 勇士的弓已經受遏折； 軟弱的人得著氣力。

⁵ 富足的著互人倩才有通食； 枵餓的無閣枵。 𣍐生育的生七個； 有真多子的到尾無賰半個。

⁶ 上主互人死，亦互人活； 互人落陰間，亦互人起來。

⁷ 上主互人散赤，亦互人好額； 互人降低，亦互人高升。

⁸ 伊對塵埃提拔困苦的人， 對糞埽堆高升欠缺的人， 互𪜶及尊貴的人坐做夥， 互𪜶坐大位。 大地的根基上主建立； 伊將世界安置佇彼頂面。

⁹ 伊保守伊忠信子民的腳步， 互歹人佇烏暗中消失； 人𣍐當靠家己的氣力較贏。

¹⁰ 敵對上主的人會受拍碎； 伊欲對天用雷摃𪜶。 上主欲審判全世界。 伊欲賜氣力互伊的君王， 互伊所揀選的頭攑高高。

¹¹ 以利加拿倒去伊佇拉瑪的厝。囝仔撒母耳受祭司以利指導，服事上主。

以利的兩個子

¹² 以利兩個子是匪類，藐視上主，

¹³ 無守祭司取獻祭的肉的規定。人獻祭肉啲煮的時，祭司的僕人就來，攑三爪的肉叉，

¹⁴ 插入鍋仔鼎仔，鐕出來的肉祭司就提去。彼時，祭司對來示羅獻祭的以色列人攏按呢做。

¹⁵ 毋若按呢，肉油猶未燒以前，祭司的僕人就來，給獻祭的人講：「肉一寡提來去互祭司烘；伊無愛煮過的肉，愛生的。」

¹⁶ 獻祭的人若講：「油燒了，肉才照你所愛的提去。」 祭司的僕人就講：「𣍐用得，隨時互我；若毋，我欲強提去。」

¹⁷ 以利兩個子的罪佇上主眼中非常嚴重，因為𪜶藐視獻互上主的祭物。

撒母耳佇示羅

¹⁸ 彼時撒母耳猶細漢，穿幼麻布的以弗得祭司服啲服事上主。

¹⁹ 伊的老母逐年給伊做一領細領外袍，及伊的丈夫上來獻年祭的時，帶來互伊。

²⁰ 以利給以利加拿及伊的某祝福，講：「願上主對此個婦仁人閣賜你子兒，來補你獻互上主此個囝仔。」 𪜶就倒去𪜶兜。

²¹ 上主賜福哈娜，互伊閣生三個後生、兩個查某子。囝仔撒母耳繼續服事上主，日日大漢。

以利警告伊的子

²² 以利已經真老，聽著伊的子對以色列眾人所做的代誌，閣聽著𪜶及會幕門口做工的婦仁人做夥睏。

²³ 以利給𪜶講：「恁是按怎做此款歹代誌？我對上主的子民聽著恁的歹行為。

²⁴ 我的子啊，毋通按呢。我有聽著上主的子民對恁的風評真僫。

²⁵ 人得罪人，上帝會給伊審判；人若得罪上主，啥人會當替伊辯護？」 毋拘𪜶毋聽老父的話，因為上主已經決定欲刣𪜶。

²⁶ 囝仔撒母耳日日大漢，上主及人愈疼伊。

預言以利家的災禍

²⁷ 有一日，有一個上帝重用的人來見以利，對伊講：「上主按呢講：『恁祖先做埃及王的奴隸的時，我有對𪜶顯現。

²⁸ 我對以色列眾支族揀亞倫的家做我的祭司，佇我的祭壇獻祭，燒香，穿以弗得祭司服服事我。以色列人用火燒獻互我的祭物，我攏有分互恁祖先。

²⁹ 我所命令佇我的厝獻的牲禮祭物，恁是按怎給𪜶踐踏？你看重你的子較過頭尊重我；竟然准𪜶對我的子民以色列獻的祭物，提上好的份去食甲肥滋滋？』

³⁰ 「所以上主 — 以色列的上帝講：『我雖然曾應允，你的家及你的宗族會永遠服事我，毋拘現在我上主決定無欲照按呢對待恁；因為尊重我的，我欲尊重伊；藐視我的，欲受看輕。

³¹ 看，日子啲欲到，我欲斬斷你及你的宗族的手骨，按呢你的家族無人會長歲壽。

³² 佇我賜福互以色列人的時，你顛倒會看見你的厝衰敗；你的家族無人會長歲壽。

³³ 我會給你留一個後代佇我的祭壇服事，毋拘你的目睭會失明，心絕望；其他的後代攏會早死。

³⁴ 你兩個子何弗尼及非尼哈會仝一日死，這證明我對你講的話一定實現。

³⁵ 我會為家己設立一個忠實的祭司，伊會照我的心意做代誌。我會為著伊建立穩固的家；伊會一世人服事我所選立的王。

³⁶ 你的後代所賰的人攏會對伊求乞討食，講：求你互我參與祭司的工作，互我通度三頓。』」