撒母耳記上卷 18 - 現代台語譯本漢字版

¹ 大闢及掃羅話講煞。約拿單及大闢心結相連；約拿單疼伊親像疼家己的性命。

² 對彼日起，掃羅給大闢留佇身邊，無互伊倒轉去𪜶老父的厝。

³ 約拿單及大闢兩人結約，因為約拿單疼大闢親像家己的性命。

⁴ 約拿單褪伊的外衫互大闢，閣將軍服，連刀、弓、腰帶嘛攏互伊。

⁵ 掃羅無論派大闢去叨位，大闢所做的攏順利，所以掃羅派伊做部隊的指揮官；眾人及掃羅的官長攏真滿意。

掃羅怨妒大闢

⁶ 大闢拍死歌利亞倒來的時，所有的婦女對以色列逐個城市庄社出來，唱歌，跳舞，拍玲瓏鼓，彈琴作樂來迎接掃羅王。

⁷ 許個婦女跳舞，有的唱，有的應，講： 掃羅刣死千千； 大闢刣死萬萬。

⁸ 掃羅非常受氣，無歡喜此個話，就講：「將萬萬互大闢，千千互我，賰王位猶未互伊若定。」

⁹ 對彼日起，掃羅看著大闢就給伊睨。

¹⁰ 隔日，對上帝遐來的歹神完全控制掃羅，伊就佇厝內開始亂講話。大闢照常用手彈琴；掃羅手裡有攑槍，

¹¹ 就給彼支槍射去，想講：「我欲給大闢射迵過，給伊釘佇壁裡。」大闢有兩遍閃開。

¹² 掃羅驚大闢，因為上主離開伊，及大闢同在。

¹³ 因為按呢，掃羅互大闢離開，派伊指揮一千個兵。大闢就做頭領導軍隊。

¹⁴ 大闢所做的代誌攏成功，因為上主及伊同在。

¹⁵ 掃羅看著大闢所做的代誌攏成功，就閣較驚伊。

¹⁶ 毋拘以色列及猶大的人民攏擁護大闢，因為伊攏做頭領導。

大闢娶掃羅的查某子

¹⁷ 掃羅給大闢講：「我的大查某子米拉互你做某，毋拘你著做我盡忠的勇士，為上主交戰。」 掃羅心內想：「我毋通親手害伊，著借非利士人的刀互伊死。」

¹⁸ 大闢給掃羅講：「我算什麼？我有什麼身份？阮的家族佇以色列中算什麼？我哪有資格通做王的子婿？」

¹⁹ 掃羅的查某子米拉應該及大闢成親的時到，掃羅竟然將伊互米何拉人亞得列做某。

²⁰ 掃羅另外一個查某子米甲愛大闢；有人給掃羅講，掃羅聽了真歡喜。

²¹ 掃羅心內講：「我將此個查某子嫁互伊，做羅網，通借非利士人的手害死大闢。」 掃羅第二遍給大闢講：「你通做我的子婿。」

²² 掃羅就吩咐人臣講：「恁私下給大闢講：『王真合意你；人臣嘛真愛你，按呢你通做王的子婿。』」

²³ 掃羅的人臣將諸個話講互大闢聽；大闢講：「恁想，做王的子婿豈是小事？我不過是喪鄉卑微的人。」

²⁴ 掃羅的人臣將大闢所講的給伊回復。

²⁵ 掃羅講：「恁著給大闢講，王無愛什麼聘禮，只有愛一百個非利士人的包皮，通替王給對敵報復。」掃羅的企圖是欲互大闢死佇非利士人的手下。

²⁶ 掃羅的人臣將諸個話給大闢講，大闢就願意做王的子婿。指定的日期到以前，

²⁷ 大闢導部下去刣死兩百個非利士人。大闢將許個包皮全數獻互王，通做王的子婿。掃羅就將查某子米甲互大闢做某。

²⁸ 掃羅看出上主及大闢同在，閣知查某子米甲嘛愛大闢，

²⁹ 掃羅就閣較驚大闢，歸世人及大闢作對。

³⁰ 非利士的首領常常出來攻擊以色列人；逐遍交戰，大闢的戰果攏比掃羅的官長較輝煌。大闢的名聲愈來愈響。