撒母耳記上卷 17 - 現代台語譯本漢字版

歌利亞挑戰以色列人

¹ 非利士人聚集軍隊欲交戰；𪜶佇猶大的梭哥集合，佇梭哥及亞西加中間的以弗‧大憫紮營。

² 掃羅及以色列人嘛聚集，佇以拉的山谷紮營，排陣欲對抗非利士人。

³ 非利士人及以色列人分別佇兩旁的山排陣，中間有山谷隔開。

⁴ 有一個非利士勇士迦特人歌利亞對營內行出來，向以色列人挑戰；伊高三公尺較加，

⁵ 頭殼戴銅的頭盔，身軀穿有鱗的戰甲，戰甲重五十七公斤，

⁶ 大腿用銅的甲保護，肩頭揹一支銅的槍；

⁷ 槍的柄親像織布機的車心赫粗；干焦槍的頭的鐵就有七公斤重；伊的頭前有一個人給伊夯盾牌。

⁸ 伊徛啲，對以色列軍隊喝講：「恁排陣欲創啥？我是非利士的勇士，恁是掃羅的部下。恁揀一個人落來遮，

⁹ 伊若有才調及我鬥輸贏，閣給我刣死，阮就做恁的奴才；伊若互我刣死，恁就做阮的奴才服事阮。」

¹⁰ 彼個非利士人閣講：「今仔日我對以色列軍隊嗆聲；好膽派一個及我拼生死！」

¹¹ 掃羅及以色列軍兵聽著非利士人諸個話，攏真懍，真驚。

¹² 大闢是猶大 伯利恆的以法他人耶西的子。耶西有八個子。掃羅作王的時，耶西年歲多，已經老。

¹³ 耶西三個較大漢的子攏隨掃羅出征；上大的叫做以利押，第二的亞比拿達，第三的沙瑪。

¹⁴ 大闢是煞尾子；彼三個兄哥跟隨掃羅的時，

¹⁵ 大闢為著欲飼𪜶老父的羊群，佇伯利恆及掃羅遐來來去去。

¹⁶ 彼個非利士人早暗出來挑戰，有四十日久。

¹⁷ 有一日，耶西給伊的子大闢講：「你緊將焙好的麥穗十公斤，及十個餅提去軍營互恁兄哥；

¹⁸ 閣帶十塊起司，送互𪜶的指揮官。去看恁兄哥有平安無，續帶證據轉來。

¹⁹ 掃羅及恁三個兄哥，以及以色列眾人，佇以拉的山谷及非利士人啲交戰。」

²⁰ 第二日透早，大闢將羊群交互別人顧，就照耶西的吩咐帶食物去到軍營；彼時軍隊抵仔出去戰場，喝聲欲交戰。

²¹ 以色列人及非利士人攏排陣相對。

²² 大闢給物件交代顧守的人，就走去戰場，給伊的兄哥請安。

²³ 伊及𪜶講話的時，看著彼個非利士的勇士迦特人歌利亞對營內出來，給以色列人講仝款的話；大闢攏有聽著。

²⁴ 以色列眾人一下看著彼個人就驚惶逃走。

²⁵ 以色列人講來講去：「彼個行出來的人，恁有看著無？伊出來給以色列人嗆聲。給伊刣死的人，王有一大筆獎金欲互伊，嘛欲將查某子嫁互伊，閣互𪜶老父全家免納稅金，免服事王。」

²⁶ 大闢問徛佇伊身邊許個人：「刣死彼個非利士人，洗除以色列的見笑此個人會得著什麼？彼個無受割禮的非利士人是啥人，閣敢給永活上帝的軍隊嗆聲！」

²⁷ 軍兵就照前的話給大闢回答，講刣死彼個人的，會當得著什麼報賞。

²⁸ 大闢的大兄以利押聽著大闢及人講話，就對伊發受氣，講：「你哪來遮？曠野彼幾隻羊你放互啥人顧？我知，你假𠢕；你啲想啥我攏知。你來是欲看人相刣。」

²⁹ 大闢講：「我無做什麼，問一下也𣍐用得噢？」

³⁰ 大闢就離開去尋別人，問仝款問題，軍兵嘛用仝款的話應伊。

³¹ 有人聽著大闢講的話，就去給掃羅報告；掃羅就派人叫大闢來。

³² 大闢給掃羅講：「咱毋免驚彼個非利士人，請互你的僕人去及伊決鬥。」

³³ 掃羅對大闢講：「你無法度及此個非利士人決鬥；你猶少歲，毋拘伊對少年就做戰士。」

³⁴ 大闢給掃羅講：「我給阮老父顧羊的時，有獅抑是熊來咬羊仔；

³⁵ 我就給趇，給拍，將羊仔對𪜶的嘴救出來。獅抑是熊若欲咬我，我就摠伊的嘴鬚，給伊拍死。

³⁶ 我曾拍死獅及熊；此個無受割禮的非利士人，我嘛欲按呢給拍死，因為伊藐視永活上帝的軍隊。」

³⁷ 大闢閣講：「上主有救我脫離獅及熊的爪，伊嘛會救我脫離此個非利士人的手。」 掃羅給大闢講：「你去，上主及你同在。」

³⁸ 掃羅就用家己的軍服互大闢穿，用銅的頭盔互伊戴，閣互伊穿戰甲。

³⁹ 大闢給刀縖啲。因為伊無慣勢穿諸個，就試行看覓咧，然後給掃羅講：「穿諸個我行𣍐去，因為𣍐慣勢。」大闢就攏褪起來。

⁴⁰ 大闢手攑柺仔，去溪邊揀五粒光滑的石頭，囥佇伊顧羊啲用的袋仔，手提挕索，然後行倚彼個非利士人。

⁴¹ 像時，彼個非利士人嘛行倚大闢；攑盾牌的兵行佇頭前。

⁴² 彼個非利士人看著大闢，就看輕伊；因為伊少年，紅膏赤蠘，生做英俊。

⁴³ 彼個非利士人對大闢講：「我豈是狗？你攑柺仔欲創啥？」非利士人就指家己的神明咒詛大闢。

⁴⁴ 彼個非利士人閣給大闢講：「來，我欲用你的肉飼鳥仔及野獸。」

⁴⁵ 大闢對彼個非利士人講：「你是攑刀，攑長槍、短槍來攻擊我；我是奉上主 — 萬軍的統帥的名，就是你所藐視以色列軍隊的上帝，來攻擊你。

⁴⁶ 今仔日上主欲將你交佇我的手；我欲給你刣死，給你斬頭。今仔日我欲用非利士軍兵的身屍飼鳥仔及野獸，互全世界的人攏知以色列有上帝；

⁴⁷ 閣互所有聚集佇遮的人攏知，上主互人得勝毋是用刀，毋是用槍。交戰的勝敗上主啲決定；伊欲將恁交佇阮的手。」

⁴⁸ 歌利亞行進前欲攻擊大闢。大闢趕緊走進前去迎戰。

⁴⁹ 大闢對袋仔內提一粒石頭出來，用挕索挕去，抌著歌利亞的頭額，石頭鑽入頭額，伊就倒落去，面仆佇地裡。

⁵⁰ 按呢，大闢無用刀，只有用挕索及石頭就拍死歌利亞。

⁵¹ 大闢走去，踏佇歌利亞的身軀頂，然後將伊的刀拔出來，給伊刣死，斬斷伊的頭。非利士人看著𪜶的勇士已經死，就攏逃走。

⁵² 以色列人及猶大人就那喝喊那追殺非利士人，追到迦特及以革倫的城門；對沙拉音到迦特及以革倫，沿路攏是屍體。

⁵³ 以色列人追殺非利士人了後，倒轉來搶奪𪜶的營地。

⁵⁴ 大闢將歌利亞的頭帶到耶路撒冷，毋拘給伊的軍器囥佇家己的布棚。

掃羅召見大闢

⁵⁵ 掃羅看著大闢去迎戰非利士人的時，問元帥押尼珥講：「押尼珥，彼個少年人是啥人的子？」 押尼珥講：「我指王的性命咒誓，我毋知。」

⁵⁶ 王講：「你去問看彼個少年人是啥人的子。」

⁵⁷ 大闢拍死歌利亞倒來，押尼珥就導伊來見掃羅，伊的手猶捾歌利亞的頭。

⁵⁸ 掃羅問伊講：「少年人，你是啥人的子？」 大闢講：「我是你的僕人伯利恆人耶西的子。」