撒母耳記上卷 15 - 現代台語譯本漢字版

及亞瑪力人交戰

¹ 撒母耳給掃羅講：「上主差我來給你抹油，設立你作王，治理伊的子民以色列。所以，你著聽趁上主所講的話。

² 上主 — 萬軍的統帥按呢講：『我欲刑罰亞瑪力人，因為以色列人出埃及的時，亞瑪力人曾阻礙敵對𪜶。

³ 今你著去拍亞瑪力人，給𪜶剿滅。什麼都毋通留啲；著將男、女、囝仔、嬰仔，及牛、羊、駱駝、驢，攏刣死。』」

⁴ 掃羅就召集軍兵佇提鍊，點算人數，步兵二十萬，猶大人一萬。

⁵ 掃羅來到亞瑪力的城，埋伏佇山谷中。

⁶ 掃羅給基尼人講：「恁離開亞瑪力人去別位，才免我給恁及𪜶做一下剿滅；因為以色列人出埃及的時，恁曾好款待𪜶。」基尼人就離開亞瑪力人。

⁷ 掃羅攻擊亞瑪力人，對哈腓拉到埃及東旁的書珥。

⁸ 伊活掠亞瑪力王亞甲，刣死伊攏總的人民。

⁹ 毋拘掃羅及軍兵留亞甲，及上好的牛、羊、牛仔、羊仔，以及一切的好物，毋肯給𪜶剿滅，只有毀滅許個無路用、無價值的物件。

上主棄拺掃羅

¹⁰ 上主對撒母耳講：

¹¹ 「我後悔選立掃羅作王，因為伊背叛我，無遵守我的命令。」撒母耳真慼心，歸暝求叫上主。

¹² 隔日透早，撒母耳欲去見掃羅；有人給撒母耳講：「掃羅已經去迦密，佇遐為著家己徛石碑，後來斡去吉甲。」

¹³ 撒母耳到掃羅遐，掃羅給伊講：「願上主賜福你。我已經照上主的命令做啦。」

¹⁴ 撒母耳講：「按呢噢？我哪有聽著牛及羊啲哮的聲？」

¹⁵ 掃羅講：「許個是我的軍兵對亞瑪力人遐掠來的；因為𪜶留上好的牛、羊，欲獻互上主 — 你的上帝；其他的阮攏有給剿滅。」

¹⁶ 撒母耳給掃羅講：「你恬去！我欲給你講昨暝上主給我講的話。」 掃羅給伊講：「請講。」

¹⁷ 撒母耳講：「雖然你看家己做微細，上主豈毋是互你做以色列眾支族的領袖？上主用油抹你作王，來治理以色列。

¹⁸ 上主閣派你去，命令你講：『你去及邪惡的亞瑪力人交戰，著給𪜶攏剿滅。』

¹⁹ 你是按怎無聽趁上主的話，闖去搶戰利品，做上主看做歹的代誌？」

²⁰ 掃羅給撒母耳講：「我有聽趁上主的命令，照伊的指示去交戰，掠亞瑪力王亞甲來，閣刣死所有的亞瑪力人。

²¹ 毋拘我的軍兵對應該著毀滅的戰利品中間，留上好的牛及羊，帶來吉甲欲獻互上主 — 你的上帝。」

²² 撒母耳講： 「上主豈意愛燒化祭及祭物， 較贏意愛人遵趁伊的話？ 你著知，聽趁比獻祭較好， 順趁贏過羊的油。

²³ 背叛親像行邪術是犯罪； 自高親像拜偶像是邪惡。 因為你棄拺上主的話， 伊嘛棄拺你，毋互你作王。」

²⁴ 掃羅對撒母耳講：「我有犯罪，違背上主的命令及你的話，因為我驚軍兵，聽𪜶的話。

²⁵ 今，求你赦免我的罪，及我做夥倒去，互我通敬拜上主。」

²⁶ 撒母耳給掃羅講：「我毋及你倒去；因為你棄拺上主的話；上主嘛棄拺你，毋互你做以色列的王。」

²⁷ 撒母耳越轉身欲離開，掃羅扭伊的衫仔裾，衫煞裂去。

²⁸ 撒母耳給伊講：「今仔日上主互以色列國及你斷絕關係，將以色列國交互一個佇你身邊，比你較好的人。

²⁹ 以色列的大能者，𣍐白賊，嘛𣍐改變心意；因為伊毋是世間人，伊𣍐改變心意。」

³⁰ 掃羅講：「我有犯罪；請你佇父老及以色列人面前尊重我，及我做夥倒去，互我通敬拜上主 — 你的上帝。」

³¹ 撒母耳就越轉身隨掃羅倒去；掃羅就敬拜上主。

³² 撒母耳講：「恁導亞瑪力王亞甲來我遮。」亞甲就驚驚惶惶來到撒母耳面前；亞甲講：「我死期到啦。」

³³ 撒母耳講：「你曾用刀刣死婦仁人的子，恁老母的子嘛會互人刣死。」撒母耳佇吉甲，佇上主面前，將亞甲斬做一塊一塊。

³⁴ 撒母耳倒去拉瑪；掃羅轉去基比亞伊的厝。

³⁵ 撒母耳死以前，無閣及掃羅見面；伊為著掃羅憂傷。上主嘛因為有設立掃羅做以色列王艱苦心。