撒母耳記上卷 14 - 現代台語譯本漢字版

約拿單攻擊非利士人

¹ 有一日，掃羅的子約拿單給攑伊的軍器的少年人講：「咱來去非利士人的軍營彼旁。」毋拘約拿單無給伊的老父講。

² 掃羅佇基比亞的郊外，坐佇米磯崙的石榴樹腳；隨伊的人約有六百。

³ 閣有亞希突的子亞希雅帶以弗得來佇遐。伊是以迦博的兄哥，非尼哈的子，是曾佇示羅做上主祭司的以利的孫。無人知約拿單已經離開營地。

⁴ 約拿單欲去非利士的軍營著經過的隘口，兩旁攏是尖尖真崎的石壁，一個叫做播薛，一個叫做西尼；

⁵ 北旁的石壁及密抹相對，南旁的石壁及迦巴相對。

⁶ 約拿單給攑伊的軍器的少年人講：「來，咱來去無受割禮的人的軍營遐，可能上主會幫贊咱，因為上主互人得勝毋是在佇人多人少。」

⁷ 攑軍器的給伊講：「我及你同心，你照你所愛的去做；你做前，我隨你。」

⁸ 約拿單講：「來！咱過來去𪜶遐，互𪜶看著咱；

⁹ 𪜶若給咱講『徛咧！等阮過去』，咱就定定徛啲，上去。

¹⁰ 毋拘𪜶若講『來阮遮』，咱就上去；這是上主將𪜶交佇咱的手的記號。」

¹¹ 𪜶兩人就刁故意互非利士防守的兵看著；非利士人講：「你看，希伯來人對𪜶匿的洞出來啦。」

¹² 防守的兵給約拿單及攑軍器的人講：「恁過來，阮欲互恁知死。」 約拿單就給攑軍器的講：「你隨我上去；因為上主已經將𪜶交佇以色列人的手。」

¹³ 約拿單就手擒腳踜𬦰起去，攑軍器的隨伊。約拿單拍倒非利士人，攑軍器的隨後面刣死𪜶。

¹⁴ 第一遍突擊，約拿單及攑軍器的佇四分一公頃內刣死約二十人。

¹⁵ 所有的非利士軍兵，無論佇軍營，佇野外；無論防衛的，突擊的，攏驚甲皮皮惙；大地嘛搖動，這是上帝降落互𪜶的大恐怖。

非利士人刣輸

¹⁶ 佇便雅憫地區的基比亞，掃羅的哨兵看著非利士軍兵四散，四界亂闖。

¹⁷ 掃羅給隨伊的軍兵講：「恁點算，看啥人對咱遮出去。」𪜶算了，就知約拿單及給伊攑軍器的人無佇遐。

¹⁸ 掃羅給亞希雅講：「你將上帝的約櫃扛來。」彼陣上帝的約櫃佇以色列人遐。

¹⁹ 掃羅及祭司講話的時，非利士營中喊喝的聲愈來愈大。掃羅就給祭司講：「免啦！𣍐赴問囉！」

²⁰ 掃羅及隨伊的軍兵攏聚集來到戰場，看著非利士人互相殘殺，大混亂。

²¹ 以前倚非利士人，對逐所在來到𪜶營中的希伯來人，現在反倒轉來幫贊隨掃羅及約拿單的以色列人。

²² 許個匿佇以法蓮山區的以色列人聽著非利士人逃走，就出來追殺𪜶，及𪜶交戰。

²³ 彼日上主互以色列得勝；戰爭延續到伯‧亞文彼旁。

戰後的事件

²⁴ 彼日以色列人枵甲真艱苦，因為掃羅有咒誓，命令軍兵講：「無等到日暗，我給對敵報冤仇了就食物件的人著受咒詛。」所以軍兵攏無食什麼。

²⁵ 𪜶入樹林，發見此所在土腳攏有蜜。

²⁶ 軍兵入樹林，看著有蜜啲滴，毋拘無人敢用指頭仔挖來食，因為驚受咒詛。

²⁷ 約拿單無聽著𪜶老父的咒誓，所以伸枴仔尾揬蜜房，然後用指頭仔挖來食，目睭就金，回復元氣。

²⁸ 有一個軍兵對伊講：「你的老父有嚴嚴咒誓命令軍兵講：『今仔日食物件的著受咒詛。』所以軍兵真厭倦。」

²⁹ 約拿單講：「阮老父有害著咱諸個軍兵。恁看，我干焦啖一點仔蜜，就回復元氣；

³⁰ 今仔日若出在軍兵食𪜶給對敵搶來的食物，豈毋是閣較有力通拍死較多非利士人？」

³¹ 彼日，𪜶拍敗非利士人，對密抹趕到亞雅崙；軍兵非常厭倦。

³² 軍兵闖去掠所搶的牛、羊、牛仔子，就佇遐刣，食含血的肉。

³³ 有人給掃羅報告：「軍兵有犯罪違背上主，因為𪜶食含血的肉。」掃羅大聲喝：「恁得罪上主啦！今去翱一塊大石來遮。」

³⁴ 掃羅閣講：「恁著去叫逐個軍兵牽𪜶的牛及羊來我遮，佇遮刣來食；毋通食含血的肉來得罪上主。」彼暝軍兵攏牽𪜶家己的牛去遐刣。

³⁵ 掃羅給上主起一座祭壇；這是伊頭一遍給上主起的壇。

³⁶ 掃羅講：「今咱著透暝落去趇非利士人，給𪜶搶，直到天光，給𪜶攏刣死，連一個都毋通留啲。」 軍兵講：「你看做好的，就照按呢做。」 祭司講：「咱著代先問上帝。」

³⁷ 掃羅就問上帝：「我著落去趇非利士人無？你豈會給𪜶交互以色列人？」彼日上帝無應伊。

³⁸ 掃羅講：「恁軍隊的官長攏來我遮，查明咱今仔日有犯著什麼罪。

³⁹ 我指互以色列勝利的永活的上主咒誓：『犯罪的人攏著死，甚至我的子約拿單，嘛著死。』」毋拘無人應伊。

⁴⁰ 伊就給以色列眾人講：「恁徛彼旁，我及我的子約拿單徛此旁。」 軍兵對掃羅講：「你看做好的，就照按呢做。」

⁴¹ 掃羅對上主 — 以色列的上帝講：「求你指示實情，看啥人有罪。」𪜶就抽著約拿單及掃羅，軍兵無代誌。

⁴² 掃羅講：「著佇我及我的子約拿單中間抽看啥人有罪。」𪜶抽著約拿單。

⁴³ 掃羅給約拿單講：「你給我講，你有做什麼代誌。」 約拿單講：「我確實有用枴仔尾挖一點仔蜜來啖。我甘願死。」

⁴⁴ 掃羅講：「約拿單，你一定著死；若無，願上帝加倍責罰我。」

⁴⁵ 軍兵給掃羅講：「約拿單有互以色列得著大勝利，伊豈著死？絕對毋通！阮指永活的上主咒誓，伊連一支頭毛都𣍐用得互伊落落土腳，因為伊今仔日所做的有上帝的幫贊。」按呢，軍兵救約拿單免死。

⁴⁶ 掃羅無閣追趇非利士人；非利士人就轉去𪜶本所在。

掃羅的事蹟及家族

⁴⁷ 掃羅確立以色列王權了後，去攻打周圍所有的對敵，就是摩押人、亞捫人、以東人、非利士人，及瑣巴的諸王；伊百戰百勝，拍到叨位贏到叨位。

⁴⁸ 掃羅奮勇拍敗亞瑪力人，救以色列脫離搶劫𪜶的人的手。

⁴⁹ 掃羅的子有約拿單、亦施韋、麥基‧舒亞；伊有兩個查某子，大的叫做米拉，細的叫做米甲。

⁵⁰ 掃羅的某叫做亞希暖，是亞希瑪斯的查某子；伊的元帥叫做押尼珥，是掃羅的阿叔尼珥的子。

⁵¹ 掃羅的老父基士，押尼珥的老父尼珥，攏是亞別的子。

⁵² 掃羅一生常常及非利士人有劇烈的交戰；伊看著強猛的人及勇士，攏招集𪜶加入伊的部隊。