撒母耳記上卷 13 - 現代台語譯本漢字版

及非利士人交戰

¹ 掃羅做以色列王兩年後，

² 對以色列中揀三千人；兩千個隨掃羅駐在佇密抹及伯特利山區，一千個隨約拿單駐在佇便雅憫地區的基比亞；其他的人互𪜶倒去家己的厝。

³ 約拿單攻擊佇迦巴的非利士人的軍營；此個消息佇非利士人的中間傳開。掃羅吩咐人佇全地歕哨角，叫希伯來人著注意。

⁴ 以色列眾人聽著掃羅攻擊非利士人的軍營，閣聽著非利士人厭惡以色列人，人民就隨掃羅聚集佇吉甲。

⁵ 非利士人聚集欲攻擊以色列人；有戰車三萬台、馬兵六千，步兵親像海沙赫多。𪜶上來佇伯‧亞文東旁的密抹紮營。

⁶ 以色列人看著軍隊受包圍，情形危急，就去匿佇山洞、樹林、石穴、磅孔，及焦井。

⁷ 閣有一寡人過約旦河到迦得及基列地區。 掃羅猶佇吉甲；隨伊的人攏驚惶皮皮惙。

⁸ 掃羅照撒母耳決定的日期，聽候七日。因為撒母耳猶未來到吉甲，隨掃羅的人就開始四散。

⁹ 掃羅講：「將燒化祭及平安祭的祭物提來我遮。」伊就獻燒化祭。

¹⁰ 伊獻燒化祭抵仔欲完成，撒母耳來到位。掃羅出去迎接欲給伊請安。

¹¹ 撒母耳講：「你啲做什麼代誌？」 掃羅講：「因為我看著人民四散離開我，你嘛無照決定的日期來，閣非利士人已經聚集佇密抹；

¹² 所以我想講非利士人啲欲來到吉甲攻擊我，閣我猶未求上主施恩，我才姑不將獻燒化祭。」

¹³ 撒母耳對掃羅講：「你哪即糊塗！你無遵守上主 — 你的上帝愛你守的誡命。你若有守，上主會堅固你佇以色列中的王位到永遠。

¹⁴ 今你的王位𣍐久長；上主已經尋著一個合伊心意的人，決定欲互伊做伊子民的領袖，因為你無遵守上主的命令。」

¹⁵ 撒母耳就出發，對吉甲上去便雅憫地區的基比亞。掃羅點算隨伊的人，約有六百人。

¹⁶ 掃羅及伊的子約拿單，以及隨𪜶的人攏𫢶佇便雅憫地區的迦巴。毋拘非利士人佇密抹紮營。

¹⁷ 有突擊隊對非利士軍營出來，分做三隊，一隊對俄弗拉的路去書阿勒地區；

¹⁸ 一隊對伯‧和崙的路去；閣一隊對看會著洗波音山谷，迵到曠野彼條邊界的路去。

¹⁹ 彼時以色列全地無拍鐵師傅，因為非利士人驚希伯來人製造刀及槍。

²⁰ 以色列人欲磨鋤頭、犁、斧頭、掘仔，攏著落去非利士人遐；

²¹ 若欲磨鋤頭、犁，著兩個銅錢；磨斧頭及刺棍，著一個銅錢；

²² 所以到交戰的時，隨掃羅及約拿單的人無一個手裡有刀抑是槍；只有掃羅及伊的子約拿單有。

²³ 非利士人有派兵出去防守密抹的隘口。