撒母耳記上卷 12 - 現代台語譯本漢字版

撒母耳的離別詞

¹ 撒母耳給所有的以色列人講：「恁對我的要求，我攏有聽見，就給恁設立一個王治理恁。

² 現在恁有一個王來領導恁。我已經年老，頭毛白；我的子嘛攏及恁做夥。我對少年到今，攏一直啲領導恁。

³ 我佇遮。恁著佇上主及伊所選立的王面前作證。我豈曾搶人的牛，奪人的驢？曾欺負啥人，壓制啥人？曾給人收賄賂做無公平的裁決？若有，我攏欲還恁。」

⁴ 𪜶應講：「你毋曾欺負阮，毋曾壓制阮，嘛毋曾對人提什麼。」

⁵ 伊給𪜶講：「今仔日，恁𣍐當尋著我有做什麼毋著。上主及伊所選立的王攏為我作證。」 人民應講：「上主作證。」

⁶ 撒母耳給人民講：「以前上主任命摩西及亞倫，導恁的祖先出埃及。

⁷ 今恁著徛好勢。我欲佇上主的面前給恁控告，給恁提醒，上主有為著恁及恁的祖先做真多拯救的大事。

⁸ 早前，雅各去埃及了後，恁的祖先有求叫上主，上主就差摩西及亞倫導𪜶出埃及，互𪜶佇此個所在定居。

⁹ 毋拘𪜶𣍐記得上主 — 𪜶的上帝，伊就給𪜶交互夏瑣的將軍西西拉、非利士人，及摩押王，出在許個人來攻擊。

¹⁰ 𪜶求叫上主講：『阮有犯罪，因為阮離開上主去服事巴力及亞斯她錄。求你救阮脫離對敵的手，阮就欲服事你。』

¹¹ 上主就差基甸、巴拉、耶弗他，及我撒母耳，救恁脫離四圍對敵的手，恁才會當平安徛起。

¹² 毋拘，亞捫人的王拿轄一下來攻擊恁，恁就對我講：『阮無愛，阮一定欲有一個王給阮統治。』其實上主 — 恁的上帝是恁的王。

¹³ 今看咧，恁所揀所求的王佇遮。上主已經設立一個王統治恁。

¹⁴ 恁若敬畏上主，服事伊，聽伊的話，無違背伊的命令，恁及治理恁的王嘛順趁上主 — 恁的上帝，按呢就真好。

¹⁵ 恁若毋聽趁上主的話，違背伊的命令，上主的手會攻擊恁，親像早前攻擊恁的祖先像款。

¹⁶ 今徛好勢，來看上主佇恁目睭前欲做的偉大的事。

¹⁷ 今仔日豈毋是割小麥無雨水的時？我欲求上主，伊會起雷落雨，互恁亦知亦看出恁為家己要求設立王，佇上主面前是犯大罪。」

¹⁸ 撒母耳祈求上主，上主就佇此日起雷落雨；眾人就驚畏上主及撒母耳。

¹⁹ 𪜶給撒母耳講：「請你替你的僕人祈求上主 — 你的上帝，阮才免死，因為阮為家己求一個王，真正是罪上加罪。」

²⁰ 撒母耳給人民講：「毋免驚，雖然恁做此個歹代誌，毋拘毋通偏離無隨上主；只有著全心服事上主；

²¹ 毋通偏離上主去隨虛假的神明，因為𪜶虛假無路用，𣍐當救恁。

²² 既然上主揀選恁做伊的子民，為著欲持守家己尊貴的名，伊一定𣍐棄拺恁。

²³ 我咧，我一定不斷替恁祈禱；若無，我就得罪上主。我欲指示恁好閣正直的路。

²⁴ 恁只有著敬畏上主，誠心實意服事伊；著會記得伊為著恁所做的代誌偌仔呢大。

²⁵ 恁若繼續做歹，恁及恁的王一定會做一下滅亡。」