撒母耳記上卷 11 - 現代台語譯本漢字版

掃羅拍敗亞捫人

¹ 亞捫人拿轄上去圍攻基列的雅比。雅比人給拿轄講：「你及阮簽約，阮就服事你。」

² 亞捫人拿轄應講：「互我挖恁逐個人的正目來侮辱以色列人，我就及恁簽約。」

³ 雅比的長老給伊講：「求你寬容阮七日，阮通派人去以色列全境；若無人欲救阮，阮就投降。」

⁴ 所派的人到掃羅住的基比亞，將此個消息講互民眾聽，𪜶就攏大聲哭。

⁵ 掃羅抵對園裡趕牛倒來；掃羅講：「大家是按怎啲哭？」𪜶就將雅比人的代誌給伊講。

⁶ 掃羅聽著此個消息，受上帝的神大大充滿，非常受氣。

⁷ 伊就將一對牛切做一塊一塊，交代使者送到以色列全境，警告講：「無出來隨掃羅及撒母耳的人，𪜶的牛嘛會按呢互人切做一塊一塊。」上主互人民非常驚惶，𪜶就攏同心親像一人出來應戰。

⁸ 掃羅佇比色點算人數，以色列人有三十萬，猶大人有三萬。

⁹ 𪜶給派來的人講：「恁著按呢回復基列的雅比人，講：『明仔載日中晝的時，恁會得著解救。』」派來的人轉去給雅比人講，𪜶就非常歡喜。

¹⁰ 雅比人就給亞捫人講：「明仔載阮會出來投降，出在恁對待阮。」

¹¹ 隔日，掃羅給人民分做三隊；天啲欲光的時，𪜶攻入亞捫人的軍營，一直到日中晝，拍死真多人；賰的人攏四散，隨人逃命。

¹² 人民給撒母耳講：「是啥人講『掃羅哪會當治理咱』？給𪜶交出來，阮欲給刣死。」

¹³ 掃羅講：「今仔日一個都毋通刣，因為今仔日上主有拯救以色列。」

¹⁴ 撒母耳給人民講：「來，咱來去吉甲，佇遐正式確立王權。」

¹⁵ 全部的人民就去吉甲，佇上主面前設立掃羅作王，閣獻平安祭互上主。掃羅及以色列眾人歡喜慶祝。